Փաստ ինֆո

Դատական համակարգը շուրջ 10 ամիս պարալիզացրած քրեական գործի գոյության մասին իրավապահները մոռացել են։ Դատարաններում գործերի բաշխման էլեկտրոնային համակարգում ենթադրյալ ապօրինի միջամտության վերաբերյալ քրեական գործով, որով շուրջ 2,5 տարի քննություն է իրականացվում, նախաքննական մարմինն անգամ չի կարողացել պարզել՝ արդյո՞ք իրապես որևէ միջամտություն եղել է, թե ոչ, իսկ հնարավոր մեղադրյալների մասին խոսելն այս փուլում անգամ ավելորդ է։ Քրեական գործով միակ «տեղաշարժը», որը եղել է, երևի թե ԱԱԾ-ից ՔԿ տեղափոխվելն է, ինչն էլ պայմանավորված էր բացառապես ԱԱԾ քննչական դեպարտամենտի լուծարմամբ և ՔԿ-ում առանձին վարչության ստեղծմամբ։

Քրեական վարույթի ճակատագիրը պարզելու համար «Փաստինֆո»-ն գրավոր հարցում է ուղարկել ՀՀ ՔԿ՝ հետաքրքրվելով, թե արդյո՞ք դատարաններում գործերի էլեկտրոնային մակագրման համակարգում հնարավոր արտաքին ապօրինի միջամտության դեպքի առթիվ նախաձեռնված քրեական վարույթը ՀՀ ԱԱԾ քննչական դեպարտամենտից արդյո՞ք փոխանցվել է ՔԿ-ին, ինչ փուլում է գործի քննությունը, վարույթի շրջանակներում արդյո՞ք հաստատվել է՝ ապօրինի միջամտության հանգամանքը, թե ոչ, եթե այո, ապա քանի գործով է եղել հնարավոր միջամտությունը, որ երկրից՝ ՀՀ-ից, թե այլ պետության տարածքից, արդյո՞ք հարցաքննվել են ԲԴԽ նախկին նախագահները, Խորհրդի անդամները։ ՔԿ-ից ստացված պատասխանը կարճ էր՝ մերժվում է տեղեկատվության տրամադրումը նախաքննության գաղտնիությամբ պայմանավորված։ Այսինքն՝ չեն ասում գործը ստացել են, վարույթ են ընդունել, քննություն է տարվում, տեղեկատվության տրամադրումը մերժում են ու վերջ։

«Հիմք ընդունելով «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 1-ին և 3-րդ կետերի պահանջները՝ հարցման վերաբերյալ տեղեկատվություն չի տրամադրվում »,- գրավոր հարցմանն ի պատասխան նշել է ՀՀ ՔԿ պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երկրորդ վարչության քննիչ Լ․ Տեր-Գևորգյանը։

Հիշեցնենք, որ 2021թ․հուլիսին ԱԱԾ-ում քննվող քրեական գործի շրջանակներում Երևանի ընդհանուր իրավասության դատարանում, Վերաքննիչ քրեական և քաղաքացիական, ինչպես նաև՝ Սնանկության և Վարչական դատարաններում գործերի բաշխման էլեկտրոնային համակարգն առգրավվել է։ Քրեական գործը, որով առգրավել են համակարգիչները և պարալիզացրել համակարգը, վերաբերում է էլեկտրոնային մակագրման համակարգում իբրև անօրինական արտաքին միջամտություններին։ Շուրջ 10 ամիս դատարաններում գործերի բաշխումն իրականացվել է ոչ թե օրենքով սահմանված կարգով, այն է՝ էլեկտրոնային մակագրման համակարգով, այլ՝ դատարանների նախագահների կողմից՝ ձեռքով մակագրման եղանակով, ինչը ոչ միայն պարալիզացրել էր դատական համակարգը, այլև՝ խիստ մտահոգիչ էր արդար դատաքննության իրավունքի իրացման համատեքստում, քանի որ կասկածի տակ էր դրվում դատարանների օրինական դատարան լինելու հանգամանքը։ Բացի այդ, հենց այդ փուլում մի շարք աղմկահարույց գործերի մակագրումն իրականացվել է ձեռքով և մակագրվել յուրային դատավորների։ Համակարգի բանալիները վերադարձվել են միայն 2022թ․ մարտին՝ փորձաքննություններից հետո։ Ընդ որում, բանալիների վերադարձման ընթացքը ևս հարթ չէր անցել՝ ԱԱԾ-ից դուրս գալուց հետո միայն չորս օր դեգերումներից հետո են բանալիները հասել Դատական դեպարտամենտին։

Հեղինակ՝ Իզաբել Սահակյան

Աղբյուր` Փաստինֆո