Փաստ ինֆո

ԲԴԽ-ում այսօր ավարտվել է Երևանի ընդհանուր իրավասության քրեական դատարանի դատավոր Վահե Միսակյանին կարգապահական պատասխանատվության ենթարկելու մասին միջնորդության քննությունը։

Դատավորի նկատմամբ կարգապահական վարույթը հարուցվել է՝ Դատավորների ընդհանուր ժողովի Էթիկայի և կարգապահական հարցերի հանձնաժողովի կողմից՝ փաստաբան Տիգրան Խաչիկյանի հաղորդման հիման վրա։

Քրեական վարույթը, որով հաղորդում է ներկայացրել փաստաբանը, վերաբերում է ավելի քան երեք տարի առաջ տեղի ունեցած վրաերթին, որից 1 տարի երեք ամիս գործով նախաքննություն է իրականացվել, դատարանում գործը քննվել է 1 տարի յոթ ամսվա ընթացքում։ Քրեական վարույթը կարճվել է, քանի որ քրեական պատասխանատվության ենթարկելու վաղեմության ժամկետներն անցել են, իսկ տուժողի իրավահաջորդի ներկայացուցիչ Տիգրան Խաչիկյանի վերաքննիչ բողոքը մերժվել է, սակայն Վերաքննիչն արձանագրել է գործի քննության ողջամիտ ժամկետի խախտում։ Ըստ այդմ, փաստաբանը դիմել է Էթիկայի հանձնաժողովին՝ դատավորի նկատմամբ վարույթ հարուցելու պահանջով։

Այսօրվա նիստում դատավոր Վահե Միսակյանը, դիրքորոշում հայտնելով իր նկատմամբ կարգապահական վարույթի վերաբերյալ, նշեց, որ գործը ձգձգելու միտում չի ունեցել։ Մասնավորապես, առաջին դատական նիստը չի կայացել, քանի որ կողմերին ուղարկված ծանուցագրերը վերադարձվել են, իսկ երկրորդ նիստի նշանակման պահին դատավորը տեղեկացված չի եղել, որ ստիպված է լինելու գտնվել ընտանեկան հանգամանքներով պայմանավորված ամենամյա արձակուրդում։ Դատական երրորդ նիստը կայացել է՝ երեք ամիս անց, դատարանն անցել է դատաքննության փուլին, իսկ նիստը նշանակվել է ավելի քան երեք ամիս անց, քանի որ այդ փուլում դատավորը մասնակցել է վերապատրաստման, իսկ ավելի ուշ՝ մահացել էր նրա ծնողը։ Հաջորդ նիստերը հետաձգվել են՝ դատախազի՝ արձակուրդում գտնվելու, դատավորի՝ այլ գործով խորհրդակցական սենյակում գտնվելու և տուժողի իրավահաջորդի դիմումի հիման վրա։ Ամփոփելով՝ Միասկյանը նշեց, որ յոթ դատական նիստերից, չհաշված վերջինը, որով քննությունն ավարտվել է, չորսը ենթակա էր հետաձգման՝ կողմերի չներկայանալու, մեկ նիստը՝ տուժողի իրավահաջորդի բացակայության, երկու դատական նիստը՝ դատարանի՝ արձակուրդում և արտերկրում գտնվելու պատճառով։ Միսակյանի խոսքով՝ ընդունում է, որ դատական նիստերի ընդհատումները տևական ժամանակով են եղել, իր համար ընդունելի է այն մտահոգությունները, թե քրեական գործերը ձգձգվում են, հետաձգվում՝ 2-3 ամիս միջակայքում, սակայն այդ մտահոգությունները տրամաբանական կլիներ, եթե ինքն ունենար 20-30 գործ, մինչդեռ, իր վարույթում 150 գործ կա։
Լսելով կողմերին՝ ԲԴԽ-ն հեռացել է խորհրդակցական սենյակ՝ որոշում կայացնելու։ Որոշումը կհրապարակվի ապրիլի 4-ին, ժամը՝ 10,00-ին։

Հեղինակ՝ Իզաբել Սահակյան

Աղբյուր` Փաստինֆո