Փաստ ինֆո

ՀՀԿ փոխնախագահ Արմեն Աշոտյանի պաշտպանները պնդում են՝ դատավոր Վահե Դոլմազյանն անհանդուրժող է Աշոտյանի ելույթներին։ Այս մասին պնդումները փաստաբան Տիգրան Աթանեսյանը ներկայացրել է դատավորին հայտնած բացարկի միջնորդությամբ՝ նշելով, որ դատավորի դրսևորած վարքագիծը և որոշումները վկայում են կողմնակալության մասին։

«Փաստինֆո»-ի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, ընթանում է ՀՀԿ փոխնախագահ Արմեն Աշոտյանի և մյուսների գործով դատական նիստը։ Դատարանում նախ քննարկման առարկա դարձվեց տուժող ԵՊԲՀ ներկայացուցչության ՝ դատավարությանը մասնակցության հարցը։ մասնավորապես, ԵՊԲՀ-ն այս փուլում դեռևս չի պատրաստվում ներկայացնել քաղաքացիական հայց։ ԵՊԲՀ օրինական ներկայացուցիչ Տիգրան Խաչիկյանը նշեց, որ այս պահին հրաժարվում են գույքային քաղաքացիական հայցի ներկայացումից՝ այդ հարցի քննարկումը թողնելով դատավարական այլ հերթի, երբ առկա կլինի եզրափակիչ դատական ակտ, որի պարագայում ԵՊԲՀ-ն հիմնավորվածության շատ ավելի բարձր շեմով՝ արդար, օբյեկտիվ արդարադատության արդյունքում կայացվելիք ապացույցների համակցությամբ գնահատման արդյունքում կորոշի՝ հայց ներկայացնելու հարցը։ Ըստ նրա՝ դա տուժողի բացառիկ իրավունքն է, դա միջանկյալ դիրքորոշում է և չի նշանակում, որ տուժող կողմն առհասարակ հրաժարվում է գույքային հայցից։ Բացի այդ, քննարկվեց նաև Խաչիկյանի՝ նիստերին մասնակցության հարցը։ Դատարանը որոշեց, որ ԵՊԲՀ ներկայացուցիչը կմասնակցի այն նիստերին, որոնց ընթացքում քննարկվող հարցերում անհրաժեշտ կլինի լսել տուժող կողմի կարծիքը։ Առավել ուշագրավ է տուժողի «օրինական ներկայացուցիչ» և «լիազոր ներկայացուցիչ» կարգավիճակների շտկումը։ Մասնավորապես, նախաքննական մարմինը ԵՊԲՀ ներկայացուցիչ Տիգրան Խաչիկյանին ճանաչել էր որպես «օրինական ներկայացուցիչ», սակայն սխալը շտկվեց՝ «լիազոր ներկայացուցչով»։ Արմեն Աշոտյանը հայտարարությամբ հանդես եկավ՝ նշելով, որ դա ևս մեկ անգամ ապացուցեց, որ գործը «ափալ-թափալ, թքել-կպցրել, սարքել » են։

«Նախաքննությամբ երկու տուժող են բերել, երկուսն էլ՝ կիսատ-պռատ։ Նախաքննական մարմնի սխալն եք շտկել քիչ առաջ։ Մյուս տուժողով՝ ասում եք՝ անձը չկա, օրինականը չկա, լիազորը չկա, բայց տուժողը կա։ Այդպես ոնց է լինում։ Մարդու սիրտը չկա, ուղեղը չկա, լյարդը չկա, բայց մարդը կա՞․․․ չեք ցանկանում դադարեցնել այդ կազմակերպության տուժողի կարգավիճակը, որովհետև այդպես մեղսագրվող արարքները հօդս է ցնդում միանգամից »,- նշեց նա։

Հաջորդիվ՝ դատարանում քննարկվեց նախագահողին բացարկի միջնորդությունը։ Տիգրան Աթանեսյանը նշեց, որ գտնում են՝ Վահե Դոլմազյանը ենթակա է բացարկման, քանի որ չի համապատասխանում անկախ և անկողմնակալ դատավորի կարգավիճակին, նրա գործողությունները հիմք են տալիս կասկածելու՝ նրա անաչառությանը։ Տիգրան Աթանեսյանը հիշեցրեց դեռևս առաջին նիստերի ընթացքում պաշտպանության կողմի հայտարարությունները, համաձայն որի՝ Արմեն Աշոտյանը քաղաքական հետապնդման է ենթարկվում իշխանությունների կողմից, իսկ Հակակոռուպցիոն դատարանը գործիք է։

«Դատավարական կարգի պահպանումը ներկայիս Հայաստանում, այն էլ՝ Հակակոռուպցիոն դատարանում՝ բացակայում է։ Իրեն ժողովրդավարության բաստիոն հայտարարած երկրում ամենակոպիտ կերպով խախտվում են մարդու և քաղաքացիների իրավունքներն ու ազատությունները, իսկ դատավորների վրա դրվել է վնգստացողի պիտակ։ Այս պայմաններում չենք ակնկալում որևէ արդարադատություն այս դատարանում, բայց իրավունք ունենք պահանջելու դատավարական կարգի պահպանում»,- նշեց Աթանեսյանը՝ հավելելով, որ այս գործով դատավարական խախտումները շատ են։

Հայտարարությամբ հանդես եկավ նաև Արմեն Աշոտյանը՝ անդրադառնալով Հայաստանում դատավորների նկատմամբ ճնշումների մասին։

«Ունենք բրդուճաչագուչային արդարադատություն, որի մասն եք նաև Դուք»,- ասաց Աշոտյանը՝ դիմելով դատավորին, ապա հիշեցրեց «Freedom House»-ի եզրակացությունը, որով արձանագրվել է, որ դատարանները կոռումպացված են, քաղաքական ճնշումների ներքո։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո