Փաստ ինֆո

4 գյուղերի մասով Ադրբեջանի պահանջը նորություն չէ և հայկական կողմը ընդունել է այդ հարցի գոյությունը։ Ավելին, ՀՀ վարչապետի մակարդակով է հայտարարվել, որ, Ադրբեջանի տարածքային ամբողջականություն ասելով, նկատի է առնվում, որ այսպես կոչված անկլավները այդ ամբողջության մեջ են։ Այստեղ հարցերը վերաբերվում են այն հանգամանքին, թե սահմանազատման հանձնաժողովների հանդիպումներում ինչ նոր շեշտադրումներ են ի հայտ եկել այդ հարցի առնչությամբ և դրանով էլ պայմանավորված բարձրաձայնումներ են կատարվում ադրբեջանական կողմից։ «Փաստինֆոյի» եթերում ասել է քաղաքական վերլուծաբան Հակոբ Բադալյանը։

Բանախոսի դիտարկմամբ, Փաշինյանը հայտարարում էր, որ այն գյուղերը, որոնք Ադրբեջանն ակնկալում է ստանալ, չեն մտնում Տավուշի մարզի մեջ։ Փաստացի, Փաշինյանը այլ ձևակերպումներով կրկնում է այդ անկլավները Ադրբեջանի տարածքային ամբողջականության մաս ճանաչելու տարբերակը։ Այստեղ բառախաղ է ստացվում և փաստացի իմաստը, գոնե առայժմ, այն է, որ լեգիտիմացվում է Ադրբեջանի պահանջը։ Նշանակում է, որ Ադրբեջանի այս դիրքորոշումները ստանում են միջազգային հանրություն կոչվածի հավանությունը, քանի որ տեսնում ենք, որ այս պահանջների հանդեպ չկա միջազգային արձագանք։
«Իրանը բարձրաձայնում է, որ իր համար խնդիր է այստեղ աշխարհաքաղաքական փոփոխությունը։ Թեհրանը նաև հայտարարում է, որ Հայաստանի անվտանգությունը նաև իր անվտանգությունն է։ Միևնույն ժամանակ, տակտիկական իմաստով այստեղ անվտանգության կառավարման տեսանկյունից կարևոր է բարձրացնել արևմտյան դերակատարների պատասխանատվությունը։ Սա ինչ որ իմաստով կարող է բավարարել նաև Իրանին և Ռուսաստանին»,- ասել է Հ․ Բադալյանը։

Մանրամասները՝ տեսանյութում։

Աղբյուր` Փաստինֆո