Փաստ ինֆո

ՌԴ ԱԳՆ պաշտոնական ներկայացուցիչ Մարիա Զախարովային խնդրել են մեկնաբանել ՀՀ վարչապետ Նիկոլ Փաշինյանի հայտարարությունը, թե Հայաստանը դուրս կգա ՀԱՊԿ-ից, եթե կազմակերպությունը չպատասխանի Երևանի բարձրացրած հարցերին։

Զախարովայի խոսքերով, Մոսկվան երբեք կասկածի տակ չի դրել և չի դնի որևէ պետության ինքնիշխան իրավունքը՝ որոշելու իր արտաքին քաղաքական կուրսը, այս կամ այն միջազգային, տարածաշրջանային կառույցի աշխատանքներում մասնակցության աստիճանը, ինչը ելնում է տվյալ երկրի ազգային շահերից ու ընդունած պարտավորություններից։ Դա ամբողջապես վերաբերում է նաև ՀԱՊԿ-ին։

«Միևնույն ժամանակ, մեզ չի կարող չանհանգստացնել հակաարդյունավետ, վերջնագրային, երբեմն էլ վիրավորական հռետորաբանությունը, որն այսօր գերիշխում է կազմակերպության թեմայի վերաբերյալ Հայաստանի ղեկավարության հայտարարություններում և սերմանվում հայ հասարակության մեջ»,-ասել է ՌԴ ԱԳՆ պաշտոնական ներկայացուցիչը։

Ինչ վերաբերում է ՀԱՊԿ-ի դեմ ներկայացված պահանջին, զախարովան նշել է, որ շատ ռիսկեր, որոնց առջև այսօր կանգնած է Հայաստանը, կարող են մեղմվել, եթե այս երկրի ղեկավարությունը համաձայնի ՀԱՊԿ դիտորդական առաքելություն տեղակայել հանրապետության տարածքում։

ՌԴ ԱԳՆ պաշտոնական ներկայացուցիչը հավելել է. «Երևանի ներկայիս կուրսի շարունակումը, ի վերջո, կարող է անուղղելի վնաս հասցնել երկու երկրների դաշնակցային հարաբերություններին, լուրջ ռիսկեր ստեղծել հանրապետության ինքնիշխանության համար, ամբողջությամբ ոչնչացնել երկրի անվտանգությունն ապահովելու գործող արդյունավետ մեխանիզմները»:

Աղբյուր` Փաստինֆո