Փաստ ինֆո

Երեւանում հասարակական տրանսպորտի ուղեվարձը սեպտեմբերի 1-ից կբարձրանա։ Համապատասխան որոշումն ընդունվեց այսօրվա Երեւանի ավագանու նիստում։

Ավագանու «Մայր Հայաստան» և «Ազգային առաջընթաց» խմբակցությունները բոյկոտեցին քվեարկությունը, սակայն ավագանին 32 կողմ, 2 դեմ, 0 ձեռնպահ ձայների հարաբերակցությամբ, այնուամենայնիվ, հաստատեց նախագիծը։
Մինչ քվեարկությունը՝ «Մայր Հայաստան» խմբակցությունը բողոքի ակցիա իրականացրեց ավագանու նիստում ՝ ընդդեմ տրանսպորտի թանկացման։ Խմբակցության անդամները «Ոչ թալանին», «Ոչ թանկացմանը» «100 դրամ» պաստառներով մոտեցան ամբիոնին, իսկ խմբակցության ղեկավար Մանուկ Սուքիասյանը հայտարարեց, որ Երևանի փոքրամասնության իշխանությունը որոշել է շեշտակի բարձրացնել տրանսպորտի գինը՝ հասցնելով 300 դրամի, ինչն անթույլատրելի է։

Քաղաքապետ Տիգրան Ավինյանն էլ հորդորեց քաղաքացիներին ծանոթանալ նախագծին։ «Վստահեցնում եմ, որ այն ահասարսուռ թանկացումները, որ բարձրաձայնվում էր նախկինում և բարձրաձայնվում է այսօր՝ իրականությանը չեն համապատասխանում»։

Հիշեցնենք, որ միասնական տոմսային համակարգի լրամշակված նախագծով նախատեսվում է ՝
ներդնել 90 րոպեանոց տոմսեր՝ 280-300 դրամ 3 ուղևորության համար,

1 օրվա համար՝ 880-900 դրամ՝ 8 երթևեկության համար,

7 օրվա համար՝ 4800-5000 դրամ՝ 30 ուղևորության համար։

Բոլոր դեպքերում, յուրաքանչյուր տրանսպորտային միջոցում նախատեսված է մեկանգամյա օգտագործում:

Կներդրվեն նաև 30 օր (8800-9000 դրամ), 90 օր (23600-24000 դրամ) և 365 օր (88000-90000 դրամ) անսահմանափակ ճանապարհորդության հնարավորությամբ տոմսեր։

Ներդրվում է նաև ամսական 10 ուղևորության բազմակի օգտագործման տոմս (2100-2200 դրամ)։

Տոմսն էլեկտրոնային եղանակով ձեռք բերելու դեպքում արժեքը կլինի ավելի ցածր, քան ֆիզիկական տոմսը:

Ցանկացած փաթեթ գնելիս քաղաքացիները կարող են օգտվել բոլոր տեսակի հասարակական տրանսպորտից։ Զեղչերը կգործեն ուսանողների, սոցիալապես անապահով կամ այլ հատուկ խմբերի համար։

Աղբյուր` Փաստինֆո