Փաստ ինֆո

Դատավորներ Մխիթար Պապոյանի, Դավիթ Գրիգորյանի, փաստաբան Ալեքսանդր Սիրունյանի հաղորդումների հիման վրա հարուցված, ապա՝ մեկ վարույթում միացված քրեական գործն ԱԱԾ-ում ավելի քան չորս տարի քնեցվելուց հետո տեղափոխվել է ՔԿ, որտեղ կշարունակի փոշոտվել քննիչների դարակներում։

«Փաստինֆո»-ն գրավոր հարցում է ուղարկել ՀՀ ՔԿ՝ պարզելու, թե ինչ փուլում է գտնվում գործի քննությունը, ՔԿ վարույթում գտնվելու ընթացքում արդյո՞ք հարցաքննվել են Ալեքսանդր Սիրունյանը, «Վանոյի Արտակը»՝ Արտակ Գալստյանը, դատավորները, արդյո՞ք որևէ անձ որպես մեղադրյալ ներգրավվել է։

Մեր գրավոր հարցմանն ի պատասխան ՔԿ-ից միայն հաստատել են, որ քրեական վարույթը տեղափոխվել է ՔԿ՝ այլ տեղեկություններ չփոխանցելով։

«Դատավորներ Դավիթ Գրիգորյանի և Մխիթար Պապոյանի հաղորդումների հիման վրա հարուցված, ապա մեկ վարույթում միացված վարույթը 2024թ․ հունվարի 26-ին ստացվել է ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության վարույթ և կատարվում է նախաքննություն։ Միաժամանակ հայտնում եմ, որ համաձայն «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 3-րդ կետի՝ պահանջվող տեղեկատվությունը պարունակում է քրեական վարույթի՝ հրապարակման ոչ ենթակա տվյալներ, ուստի տեղեկատվության տրամադրումը մերժվում է»,- «Փաստինֆո»-ի հարցմանն ի պատասխան նշել է երկրորդ վարչության ՀԿԳ ավագ քննիչ, արդարադատության երկրորդ դասի խորհրդական՝ Ն․ Այվազյանը։

ՔԿ-ն նաև չի հստակեցնում, թե, ի վերջո, վարույթն իրականացնող մարմինն արդյո՞ք վերացրել է գործով տուժող ճանաչված դատավորների իրավունքների՝ դատական կարգով արձանագրված խախտումը՝ ոչնչացնելով նրանց նկատմամբ իրականացված ՕՀՄ-ների արդյունքում ձեռք բերված տվյալները, թե՝ ոչ։

Հիշեցնենք, որ քրեական գործը հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո: Նախ` փաստաբան Ալեքսանդր Սիրունյանը դատավոր Դավիթ Գրիգորյանին սոցիալական ցանցում մեղադրեց կոռուպցիայի մեջ, ինչին անմիջապես արձագանքեց դատավորն ու հաղորդում ներկայացրեց, որ ստուգեն փաստաբանի հայտնած տվյալները ու կամ իրեն մեղադրանք առաջադրեն` կաշառակերության համար, կամ փաստաբանին` սուտ մատնության:

Ինչպես գիտենք` դատավորին նման մեղադրանք չի առաջադրվել, այսինքն՝ այս 4 տարիների ընթացքում ԱԱԾ-ն օգտագործելով իր օպերատիվ ռեսուրսները չի գտել նման որեւէ ապացույց, բայց դատավորին վարկաբեկելու համար փաստաբանի գործողություններն գնահատական չի տրվել: Թերեւս չունեն թույլտվություն՝ փաստաբանին մեղադրանք առաջադրելու համար։

Մյուս դրվագը վերաբերում է վերաքննիչ քրեական դատարանի դատավորներ Արշակ Վարդանյանին, Մխիթար Պապոյանին ու դատարանի նախագահ Վազգեն Ռշտունուն: Ֆեյսբուքյան օգտատեր Արտակ Գալստյանը, որը հայտնի է որպես «Վանոյի Արտակ», գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից:

Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը: 2,5 տարի ԱԱԾ-ում իրականացված քննության արդյունքում, ի վերջո, դատավորներ Դավիթ Հարությունյանը, Մխիթար Պապոյանը, Արշակ Վարդանյանը տուժող են ճանաչվել, իսկ դատավորներ Վազգեն Ռշտունին և Արման Հովհաննիեսյանը՝ հարցաքննվել։ Ընդ որում, թեև քրեական գործը հարուցված է դատավորներին զրպարտելու մասին հաղորդման հիման վրա, օրենքի խախտմամբ օպերատիվ միջոցառումներ են իրականացվել հենց դատավորների նկատմամբ։

Գաղտնալսվել են Երևանի ընդհանուր իրավասության դատարանի դատավորներ Դավիթ Հարությունյանը, Արման Հովհաննիսյանը, Վերաքննիչ քրեական դատարանի դատավորներ Մխիթար Պապոյանը, Արշակ Վարդանյանը, այն ժամանակ դատարանի նախագահի պաշտոնը զբաղեցնող Վազգեն Ռշտունին, ինչպես նաև Սահմանադրական դատարանի դատավոր Հրայր Թովմասյանը:

Դատավոր Հարությունյանն ու Արշակ Վարդանյանը վիճարկել են իրենց նկատմամբ ՕՀՄ-ներ իրականացնելու թույլտվությունները, ինչի արդյունքում արձանագրվել է դատավորների իրավունքների խախտումը, իսկ ՕՀՄ իրականացնելու արդյունքում ձեռք բերված տվյալները ճանաչվել են որպես անթույլատրելի ապացույց, և վարույթն իրականացնող մարմնի հավաստմամբ` հանվել գործից, սակայն՝ չեն վերացվել։ Ավելին, այս դրվագով եւս դատավորներին մեղադրանք չի առաջադրվել, այսինքն՝ 4 տարի տեւած քննության արդյունքում որեւէ նման ապացույց չեն գտել, բայց կրկին զրպարտողին մեղադրանք չեն առաջադրել։

Նկատենք, որ երկու դեպքում էլ գործ ունենք արդարադատության դեմ ուղղված հանցագործությունների կատարման հետ ու քննիչների այս անկարողությունը ուղղակի վկայում է իրավապահ համակարգի անգործունակության, եթե չասենք քաղաքական իշխանությանը ծառայելու մասին, քանզի նշված դրվագներից որեւէ մեկով պատասխանատվության չի ենթարկվել զրպրատությունների միջոցով դատավորի վրա ազդելու փորձեր կատարած անձինք։ Իսկ գուցե վերջիններս հենց հատուկ հրահանգով են դա արել, ուստիեւ օգտվում են բարձր հովանավորչությունից։

Հեղինակ՝ Իզաբել Սահակյան

Աղբյուր` Փաստինֆո