Փաստ ինֆո

Մեզ որպես մարդ կերպար ուզում են վերացնել ։ Արդեն կրթություն չկա։ Նման տեսակետ է հայտնել Երևանի Կոմիտասի անվան կոնսերվատորիայի դասախոս Նունե Բադալյանը։

Ինչպես արդեն հայտնել ենք՝ իշխանությունները մտադրվել են փակել Կոնսերվատորիան՝ ներկայացնելով, թե, իբր, մի քանի բուհ միավորում են՝ արվեստի ակադեմիա ստեղծելու համատեքստում։ Այսօր Կոնսերվատորայում տեղի է ունեցել ժողով՝ ստեղծված վիճակը քննարկելու համար, որին մասնակցել են դասախոսներ եւ ուսանողներ, իսկ լրագրողների մուտքն արգելված է եղել։

«Քանդե՚նք ամեն ինչ մինչև զրո, մինչև կտեսնենք կսարքենք թե ոչ։ Արդեն կա համալիրը։ Ե՛վ պարարվեստի ուսումնարանն է էստեղ, ե՛ւ երաժշտական դպրոցն է, և՛ կոնսերվատորիան է արդեն կա»,- քննարկումից հետո լրագրողների հետ զրույցում ասել է Նունե Բադալյանը՝ ավելացնելով «ուզո՞ւմ եք ստեղծել արվեստի ակադեմիա ստեղծել, շատ լավ, ստեղծե՛ք, մ՛ի քանդեք սա։ Այնքան լավը ստեղծեք մենք ուզենանք գնալ»։

Տիկին Բադալյանի խոսքերով՝ այսօր ունենք հոգևոր սննդի մեծ պրոբլեմ։ «Երբ հոգևոր սնունդը դատարկվում է՝ մենք գազան ենք դառնում։ Մարդ չենք մնում այ դրա համար էլ էսպիսի որոշումներ են կայացվում, անիմաստ։ Մեզ որպես մարդ կերպար ուզում են վերացնել։ Արդեն կրթություն չկա»,- հայտարարել է դասախոսը։

Նրա խոսքերով՝ երաժիշտը Կոնսերվատորիայում աշխատում է, առավոտյան վազում է փորձի , հետո մտնում դասախոսության ։ «Եթե հասավ դրան, ես ունեմ բավականին մեծ հնարավորություններ՝ մարդկանց հասցնելու, ուսանողներին ոտքի հանելու , չեմ ուզում մտնել այդ կեղտոտ խաղերի մեջ , բայց իմ նման շատ մարդիկ կան այս շենքում, թո՛ղ չմտածեն, որ մենք պոլիտիկայի մեջ քիթ չենք խոթում, ուրեմն չենք կարող»,- ասել է նա՝ նշելով, որ հավաքված է եղել ամբողջ ինտելիգենցիան, իսկ ինչպես պատմությունից է հայտնի՝ Ինտիլիգենցիան է անում ռեվոլուցիան։ Թո՛ղ չստիպեն։

«Սա բուն է , որտեղ կարող են բզզալ, այ այդտեղ կարող է սկսվել շատ վատ վերաբերմունք։ Պետք չի անել, մենք կգնանք ռադիկալ քայլերի»,- ասել է նա։

Լրագրողի հարցին, որ Արցախի կորստի օրհասական պահերին լուռ են մնացել՝ Բադալյանը նշել է. «Ես արվեստի մարդ եմ , ես զբաղված եմ իմ գործով , ես իմ ուսանողներին ասում եմ, եթե ամեն մարդ իր տեղը իր գործը լավ անի, պետությունը ոտքի կկանգնի։ Պոլիտիկայի մեջ մենք չենք կարող մտնել։ Խոսել կարող ենք մեր բուհի մասին։ Երբ պարոն Փաշինյանը հրավիրեց արվեստագետների, ես պատահաբար տեսա , որ էնտեղ արվեստագետ չկար։ Իհարկե կա հիասթափություն։ Ոչ մեկ բանի տեղ չի դնում, չեն խորհրդակցում»։

Աղբյուր` Փաստինֆո