Փաստ ինֆո

Շատ վաղուց Հայաստանի և Ադրբեջանի միջև գոյություն է ունեցել և շարունակում է գոյություն ունենալ մի պայմանավորվածություն առ այն, որ այն զինվորները, որոնք, մոլորվելով հայտնվում են հակառակորդի մոտ, կարճ ժամանակ անց վերադարձվում են։ Այս պայմանավորվածությունը մի իքս պահից խախտվել է, պարզվել է որ ընկալման շուրջ կան խնդիրներ։ Այս մասին այսօր հրավիրված ասուլիսում ասաց ՀՀ վարչապետ Նիկոլ Փաշինյանն՝ անդրադառնալով հարցին, թե ինչու վերջին անգամ մոլորված ադրբեջանցի զինծառայողը վերադարձվեց առանց նախապայմանի ու որեւէ հայ գերի չվերադարձվեց Հայաստան։

«Պարզվել է, որ այն զինծառայողները, ովքեր դիտավորյալ են խախտել սահմանը կամ թեկուզ մոլորվելու ընթացքում գործել են ինչ-որ արարքներ, որոնք տեղավորվել են քրեական օրենսգրքի տրամաբանության մեջ՝ հասկանալիորեն կա բարդություն այդ խնդիրը լուծելու համար։
Մենք ՝ Ադրբեջանի նախագահի հետ, վերջին շրջանի քննարկումներում վերահաստատել ենք, որ եթե շփոթվելու դեպք լինի՝ պետք է վերադարձնենք»,- ասել է Փաշինյանը։

Ըստ նրա՝ սա երկար ժամանակ անց առաջին դեպքն է, որ այդ պայմանավորվածությունը պրակտիկայում վերակենդանացվում է։

Նա նաև հայտնեց, որ ՀՀ-ում հարուցվել է քրեական գործ, տարվել է քննություն՝ պարզելու, թե անձը անցել է դիտավորյալ թե շփոթությամբ, կամ թե արդյոք ՀՀ տարածքում հայտնվելուց հետո իրականացրել է գործողություններ, որոնք քրեական օրենսգրքում պատժելի արարքներ են։
«Պարզվել է, որ ոչ։ Այն, որ ՀՀ քննչական մարմիները վարել են քննություն՝ Ադրբեջանի քաղաքացու նկատմամբ ևս վկայում է մեր ինստիտուցիոնալ բարեփոխումների և ժողովրդավարության մասին։

Երբ պարզել ենք, որ օբյեկտիվորեն զինվորին քրեական օրենսգրքով որևէ բանում մեղադրելու հիմք չկա՝ բնականաբար, պետք է գործեր այն պայմանավորվածությանը, որ կա»,- ասել է Փաշինյանը։

Փաշինյանը հայտարարել է, թե մարդուն կալանքի տակ պահելու համար պետք են հիմքեր, եթե մարդուն կալանքի տակ պահելու հիմք չկա, ապա ՀՀ -ն չի կարող անձին պահել կալանքի տակ կամ պատանդ՝ անկախ նրանից, թե նա որ երկրի քաղաքացի է։ Դա մեր երկրի գործելակերպը չէ»։
Ինչ վերաբերում է Ադրբեջանում պահվող հայ գերիների վերադարձին՝ նա ընդգծեց, որ ամենօրյա աշխատանք է կատարվում այդ ուղղությամբ։

Աղբյուր` Փաստինֆո