Փաստ ինֆո

Թուրքիան հնարավոր է չսահմանափակվի սպառնալիքներով ու կետային հարված հասցնի ՀՀ-ում գտնվող եզդիաբնակ գյուղերին։ Այդ մասինս «Փաստինֆո»-ի եթերում ասել է միջազգայնագետ Գրիգոր Բալասանյանը։

«Տեղեկություն է տարածվում այն մասին, որ Թուրքիան հրանոթներ է տեղակայում Հայաստանի սահմանից ընդամենը 200 մետր հեռավորության վրա։ Ընդ որում՝ դրանք ծանր հետանիներ են՝ մինչև 10 կմ խոցելիության հնարավորությամբ։ Ըստ տարածված տեղեկատվության՝ դրանք տեղակայվում են Մարգարայի ուղղությամբ»,- նշել է Բալասանյանն ու ավելացրել, որ կարևոր է ոչ այնքան այն, որ Թուրքիան հրանոթներ է տեղակայում և դա բացատրում զորավարժություններով, այլ այն, որ այդ հրանոթները, որոնք սովորաբար թիկունքից են գործում, տեղակայվում են հենց սահմանին։

«Նշանակում է Թուրքիան ավելի հեռուն գնացող նպատակներ ունի, քան միայն շանտաժի ենթարկել Հայաստանին, հայ ժողովրդին կամ վախեցնել»,- արձանագրել է գործիչը։

Նա հիշեցրել է, որ մի քանի տարի առաջ Թուրքիայի նախագահ Ռեջեփ Թաիփ Էրդողանը հայտարարում էր, թե տեղեկատվություն ունեն, իբր, Հայաստանի եզդիական բնակավարերում «Քրդական բանվորական» կուսակցության մարտիկներ են թաքնվում։

«Իբր այդ գյուղերում մարտական պատրաստության ճամբարներ են տեղակայվում, որտեղ պատրաստում են մարտիկների։ Ըստ էության՝ էրդողանն օգտագործում էր այն խաղաքարտը, որն օգտագործում էր Իրաքի դեմ։ Հիմա էրդողանին թվում է, որ հայ-ռուսական հարաբերությունների լարվածության ֆոնին, երբ «Զվարթնոց» օդանավակայանից ռուսների դուրս բերման պահանջ է ներկայացվել, հնարավոր է դուրս բերվի նաև ռուսական ռազմաբազան, որը փակում է ողջ հայ-թուրքական սահմանը։ Ըստ թուրքական տրամաբանության՝ քանի դեռ հայ-ռուսական հարաբերությունները գտնվում են ճգնաժամում՝ Թուրքիան սա կարող է օգտագործել ահաբեկցության դեմ պայքարի շրջանակում, և փորձել կետային հարվածներ հասցնել այն հատվածներին, որոնք գտնվում են ՀՀ տարածքում։ Դրանք հիմնականում եզդիաբնակ հատվածներն են»,- նշել է Բալասանյանն ու ավելացրել, որ ուղիղ գծով Մարգարայից մինչև Արագածի եզդիաբնակ գյուղեր՝ հենց մի քանի կիլոմետր է։

Աղբյուր` Փաստինֆո