Փաստ ինֆո

Ֆրանսիայի արեւելքում գտնվող Մայա-լե-Կան քաղաքի մարտական պատրաստության կենտրոնի (CENTAC) ղեկավար, գնդապետ Աքսել Դենին պատմել է ֆրանսիական զորքերի՝ իրականությանը մոտ ընթացող բարձր ինտենսիվությամբ ռազմական հակամարտության նախապատրաստման մասին, հաղորդում է Politico պարբերականը:

«Աշխարհը բացահայտել է իր իրական էությունը՝ անկայուն, վտանգավոր, և այստեղ ամեն մեկը չէ, որ ընկեր է։ Մենք պատրաստվում ենք զգոնության, պատրաստակամության մշակույթին հնարավորինս սեղմ ժամկետներում․.. CENTAC-ը միակ վայրն է (Ֆրանսիայում), որտեղ կարելի է տեսնել, թե ինչ է պատերազմը», - պատմել է Դենին պարբերականին։

Politico-ն նշում է, որ CENTAC-ում, որն ունի 120 քառակուսի կիլոմետր տարածք, որն ավելի մեծ է, քան Փարիզը, զորքերի պատրաստման պայմանները հնարավորինս մոտ են իրական մարտական պայմաններին: Նաև դա այն միակ վայրն է երկրում, որտեղ հետևակը, զրահատեխնիկան, հրետանին և ինժեներները, որոնք սովորաբար ցրված են ամբողջ Ֆրանսիայում, համատեղ զորավարժություններ են անցկացնում:

Պարբերականը գրում է, որ կենտրոնի սպաները պոտենցիալ թշնամիներ չեն նշում, սակայն վարժանքն ուղղված է զորքերի նախապատրաստմանը Ռուսաստանի նման հակառակորդի դեմ պայքարին:

«Մենք նույն իրավիճակում չենք, ինչ Ուկրաինան, բայց մենք դաշինքի մաս ենք կազմում, իսկ դա ենթադրում է պարտավորություններ․.. Հավաքական պաշտպանության, հատկապես ՆԱՏՕ-ում վստահության գաղափարը կարեւոր նշանակություն ունի», - հավելել է Դենին։

Աղբյուր` Փաստինֆո