Փաստ ինֆո

Տնային կալանքի տակ գտնվող նախկին նախարար Վահան Քերոբյանի գործով հսկայածավալ օպերատիվ հետախուզական միջոցառումների արդյունքները մոտ են զրոյին։ Դրանք այնքան ոչ տպավորիչ ու անարդյունավետ են եղել, որ այսօր այդ խիստ խափանման միջոցների կիրառման միջոցով, և դրանք ծառայեցնելով անձանց համար որպես ցանկալի ցուցմունքներ տալու հարկադրանքի միջոց, սկսել են ձևավորել ի սկզբանե ձևավորված մտածված նարատիվի հիմքեր։ Այս մասին հրավիրված մամուլի ասուլիսին ասաց Էկոնոմիկայի նախկին նախարար Վահան Քերոբյանի պաշտպան Տիգրան Եգորյանը։

«Օրինակ՝ ենթադրենք որևէ մեղադրյալի առաջարկվում է ինչ-որ հարցադրումների վերաբերյալ պատասխաններ ստանալ, դրանք ստանալուց հետո մարդը հասկանում է, թե իրենից ինչ է ակնկալվում։ Ստանալով արդեն այդ անձանցից հարմար ցուցմունքներ, հենց այդ ցուցմունքները ստանալու բերումով այդ անձանց խափանման միջոցները փոխվում են»,- նշեց Եգորյանը։

Նրա խոսքով՝ նախաքննական մարմինը հարցեր չունի Քերոբյանին, ուղղակի չկային բովանդակային լուրջ հարցեր, որոնցից հնարավոր կլինի հասկանալ, որ մարդիկ ցանկանում են բազմակողմանիորեն քննել, պարզել, թե ինչ է տեղի ունեցել։ Ըստ Եգորյանի՝ նախաքննական մարմնի մարտավարությունն ակնհայտ է դարձնում, որ նախաքննությունը իրականացնում է հետևյալը՝ ձևավորվել է մի նարատիվ, որոշվել է, որ իրադարձություններն այնպիսին են, և անկախ փաստական հանգամանքներից, այդ նարատիվը հիմնավորելու համար փորձում են մեկնաբանություններ և տեղեկություններ ամրագրել․ «Սա, մեղմ ասած, նախաքննություն չէ, սա իրենց համոզմունքների քարոզն է, որն արտահայտվում է փաստաթղթերի միջոցով»։ Եգորյանի խոսքով՝ քնիչները բավարար պատկերացում չունեն մրցութային գործընթացից, որովհետև այդտեղ որոշիչը գինը չէ, կարևոր է նաև ապրանքի որակը։ Նրա խոսքով՝ նախաքննությամբ խեղվում է օրենքով սահմանված գործընթացն ու տրամաբանությունը, որով պետք է իրականացվի գնումները։

«Նախաքննության մարմնի պաշտոնական հրապարակումները չեն բխում գործում եղած փաստերից։ Այս խնդիրը բավական խորքային է։ Սա առաջին հերթին վերաբերում է նախաքննության որակին, դրա նկատմամբ դատախազական հսկողության որակին, որի վերլուծական մակարդակը բավական ցածր է»,- նշեց նա։

Աղբյուր` Փաստինֆո