Փաստ ինֆո

Հարևանների հետ հարաբերությունների համատեքստում Հայաստանն առանձնահատուկ նշանակություն ունի Իրանի համար։ Թեհրանում ՀՀ պաշտպանության նախարար Սուրեն Պապիկյանի հետ հանդիպմանն ասել է Իրանի պաշտպանության նախարար Մոհամմադ Ռեզա Աշթիանին։
Նա ընդգծել է, որ Իրանի դիրքորոշումը տարածաշրջանի երկրների տարածքային ամբողջականությանն ու իրենց ողջ տարածքի նկատմամբ ազգային ինքնիշխանությանն աջակցությունն ու միջազգայնորեն ճանաչված սահմանների փոփոխության անթույլատրելիությունն է։

«Կովկասի դեպքում ևս հավատարիմ ենք այս քաղաքականությանը։ Մենք աջակցում ենք Ադրբեջանի ու Հայաստանի միջև ուղիղ բանակցություններին, շփումներին և կայուն խաղաղությանը և համարում ենք, որ դա Կովկասի զարգացման համար հիմքեր է ստեղծում։

Տարածաշրջանի անվտանգության առումով հավատացած ենք, որ տարածաշրջանի անվտանգության ճարտարապետությունը պետք է նախագծվի հենց տարածաշրջանում, և տարածաշրջանի երկրների կողմից այս քաղաքականությանը հակառակ որդեգրված ցանկացած մոտեցում ընդունելի չէ։ Տարածաշրջանից դուրս անվտանգության փնտրտուքը հակառակ արդյունքն է ունենում, և տարածաշրջանը վերածում է տերությունների մրցակցության վայրի՝ տարածաշրջանի անվտանգությունն ու կայունությունն ավելի շատ մարտահրավերների բախելով։ Այդ իսկ պատճառով, չպետք է թույլ տանք, որ Կովկասը տերությունների մրցակցության վայրի վերածվի, քանի որ այդ դեպքում վտանգվում է բոլոր երկրների անվտանգությունը»,- Պապիկյանի հետ հանդիպմանն ընդգծել է իրանցի պաշտոնյան։

Աղբյուր` Փաստինֆո