Փաստ ինֆո

Իրականում դժվար է խոսել Իրանի կողմից պարբերաբար հնչող հայտարարությունները Հայաստանի կողմից անտեսելու հետևանքների մասին, դրանք բազմաթիվ կարող են լինել, և տեսանելի, և ոչ տեսանելի, բայց սա նաև հստակ ուղերձ էր ՀՀ-ին՝ կապված նրա հետ, որ Իրանը փորձում է ինքը դերակատարում ունենալ և պատրաստ է Հայաստանի հետ անվտանգային ոլորտում նույնպես համագործակցել։

Այս մասին «Փաստինֆոյի» հետ զրույցում ասաց իրանագետ Գարիկ Միսակյանն՝ անդրադառնալով ՀՀ պաշտպանության նախարարի հետ հանդիպմանը Իրանի պաշտպանության նախարար Մոհամմադ Ռեզա Աշթիանիի հայտարարությանը, թե տարածաշրջանից դուրս անվտանգության փնտրտուքը հակառակ արդյունքը կունենա։

Անդրադառնալով այն արտատարածաշրջանային ուժերին, որոնց առնչությամբ մտահոգություններ է հայտնում ԻԻՀ-ն՝ իրանագետը նկատեց, որ այդ զգուշացումներն ուղղված են Հայաստանին՝ Արևմուտքի, հատկապես ՆԱՏՕ-ի անդամ պետությունների հետ մերձեցման դեպքում հաշվի առնել նաև Իրանի դիրքորոշումը և բավական զգուշավոր գործել։ Սա նաև վերաբերում էր Թուրքիայի հետ հարաբերությունների կարգավորման գործընթացին, որին նույնպես Իրանը նայում է որպես ՆԱՏՕ-ի բլոկի պետություն։

«Ամեն դեպքում՝ հստակ ուղերձ էր նաև այն առումով, որ Իրանը ցանկանում է Հայաստանի հետ անվտանգային ոլորտում հարաբերություններ ծավալել և նաև անվտանգային ոլորտում օժանդակել Հայաստանին»,- նշեց իրանագետը։

Հարցին, թե ինչ կարող է ենթադրել այդ օժանդակությունը՝ նա նշեց, որ ամեն բան կախված է այն քաղաքականությունից, որը կվարի Հայաստանը՝ Իրանի հետ, որովհետև Իրանի կողմից եղան բազմաթիվ հայտարարություններ առ այն, որ Իրանը Հայաստանին կարող է աջակցել այնքան, որքան կցանկանա Հայաստանը։ «Նմանատիպ հայտարարություն եղավ նաև վերջերս Հայաստան ժամանած Իրանի հոգևոր առաջանորդի արտաքին հարաբերությունների գծով խորհրդականի կողմից, ով նշեց, որ Իրանը նաև անվտանգային ոլորտում կարող է Հայաստանին աջակցություն ցույց տալ, եթե դա ցանկանում է Հայաստանի Հանրապետությունը։

Նմանատիպ պարագայում դժվար է, իհարկե, կանխատեսում անել, թե հատկապես ինչ անվտանգային աջակցության մասին է խոսքը, բայց այստեղ էլ կարծում եմ ամեն բան կախված է Հայաստանի վարած քաղաքականությունից, այդ քաղաքականությունը, նաև բանակցությունների ընթացքն հաշվի առնելով, կարծում եմ, հնարավոր կլինի խոսել անհրաժեշտ պաշտպանողական, անգամ հարձակողական զինատեսակների մասին։ Սա, կարծում եմ, լուրջ գործոն կլինի մեր համար, քանի որ իրանական զինտեխնիկան նաև ուկրաինական ճակատում է ցույց տվել, որ բավական մարտունակ է։ Թե ինչուն է Հայաստանը շարունակաբար անտեսում Իրանից հնչող հորդորները և մեկնած ձեռքը՝ դժվար է հասկանալ»,- եզրափակեց Միսակյանը։

Աղբյուր` Փաստինֆո