Փաստ ինֆո

Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, այսօր շարունակվել է ԱԺ «Հայաստան» խմբակցության պատգամավոր Լևոն Քոչարյանի և Սերգեյ Ասատուրովի գործով դատական նիստը։

Լևոն Քոչարյանի պաշտպանները միջնորդել են վերացնել Քոչարյանի նկատմամբ ընտրված խափանման միջոց բացակայելու արգելքը եւ թույլատրել Լևոն Քոչարյանին՝ Միջխորհրդարանական միության վեհաշողովին մասնակցելու համար մարտի 23-28-ը մեկնել Ժնև։ Դատախազները առարկեցին միջնորդության դեմ՝ նշելով, որ նախորդ նիստին փաստաբաններն արդեն իսկ նման միջնորդություն ներկայացրել էին, և դատարանն այն մերժել էր։

Փաստաբաններն էլ արձանագրեցին, որ այժմ առկա է նոր ի հայտ եկած հանգամանք, մասնավորապես, նախորդ նիստին՝ փետրվարի 27-ին դեռևս հայտնի չէր, որ Լևոն Քոչարյանը պետք է մեկնի վեհաժողովին։ Հայտարարությամբ հանդես եկավ Լևոն Քոչարյանը՝ նշելով, որ զրո բացատրություն, զրո հիմք է ներկայացվել, թե ինչու պետք է իր նկատմամբ խափանման միջոց կիրառվի բացակայելու արգելքը։

«Գիտեք, երբ մի պրոցեսի մեջ բարոյականությունը դուրս է գալիս, հայտնվում ենք այս վիճակում։ Հիմա իմ դիմաց նստած կարո՞ղ եք նայել իմ աչքերին՝ ասելով, որ ես պետք է գնամ Ժնև և փախչեմ»,- հայտարարեց Լևոն Քոչարյանը։ Նրա խոսքով՝ Ժնևում նա պետք է ներկայացնի արցախցիների խնդիրը, որոնց բախվել ենք՝ էթնիկ զտման արդյունքում։

«Հիմա չեմ հասկանում՝ ինչ տրամաբանության մեջ պետք է չցանկանան, որ այդ հարցը չբարձրացնենք։ Կոնկրետ խոչընդոտում են իմ քաղաքական, ընդդիմադիր գործունեությունը»,- նշեց Քոչարյանը։

Դատարանը որոշեց չվերացնել Լևոն Քոչարյանի նկատմամբ ընտրված խափանման միջոց բացակայելու արգելքը՝ փաստացի դեռևս թույլ չտալով նրան մեկնել Ժնև։

Պաշտպանության կողմը պատրաստվում է նաև գրավի միջնորդություն ներկայացնել՝ պահանջելով փոխել Լևոն Քոչարյանի խափանման միջոցը և վերացնել բացակայելու արգելքը։

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

Հեղինակ՝ Իզաբել Սահակյան

Աղբյուր` Փաստինֆո