Փաստ ինֆո

2024 թ-ին ԿԳՄՍ նախարարությանը կապիտալ ծախսերի համար հատկացված միջոցներից 1 մլրդ 267 մլն 925 հազար դրամի չափով գումար կհատկացվի մի շարք կրթական և մարզական հաստատությունների ավարտական աշխատանքների ավարտին հասցնելու համար։

Նախարար Ժաննա Անդրեասյանը, կառավարության նիստում ներկայացնելով որոշման նախագիծը, հայտնեց, որ խոսքը վերաբերում է 2 մանկապարտեզի կառուցմանը, 6 մոդուլային դպրոցի, 1 ավագ դպրոցի մասնաշենքի կառուցման, 15 դպրոցի մարզադահլիճի կառուցման և 11 դպրոցի մարզադահլիճների վերակառուցման աշխատանքների մասին, միաժամանակ, նախագծով ֆինանսավորում է հատկացվում 8 դպրոցների նախագծա-նախահաշվային փաստաթղթերի մշակման և փորձաքննության ծառայությունների համար։

Փաշինյանը հետաքրքրվեց, թե հստակ պատկերացում կա՞, թե երբ են այդ դպրոցները շահագործման հանձնվելու, որտեղ շինարարությունը նոր է սկսվել։ «Նկատի ունեմ, որ աշակերտները մտնելու են առաջին դասն են անելու և շարունակելու են»։ Անդրեասյանը պատասխանեց, որ նախագծով նախատեսված բոլոր օբյեկտների շահագործման ժամկետները հստակեցված են։

Փաշինյանն անդրադառնալով տարեսկզբին դպրոցներ այցերին ասաց, որ հարց էր դրել, թե երբ են ավարտվում այդ օբյեկտների շինարարությունը։
«Այն բոլոր դեպքերում, երբ պայմանագրով սահմանված ժամկետների հետ կապված կասկածներ կան, ես ասացի, շատ լավ, լրացուցիչ ժամկետ ասեք, բայց ժամկետը պետք է պահպանվի։ Գնացինք՝ տեսանք այն, ինչ տեսանք, 2 դիլեմա կա, առաջինը, որ ասենք, աշխատեք, երբ կավարտենք՝ կավարտենք, երկրորդը, որ որոշակի ժամկետ դնենք, որը արդեն երկաթյա լինի, հակառակ դեպքում շինարարությունը կարող է երկար տևել։ Ես կարևոր եմ համարում, որ ժամկետները սահմանվեն և պահպանվեն։ Օրինակ, Արմավիրի մարզի Ջրառատ համայնքի ծանրամարտի մարզադպրոց ե՞րբ եք պատկերացնում, որ պետք է հանձնվի աշակերտներին»։

Փաշինյանն արձանագրեց, որ հաճախ լինում է, որ արձանագրվում է, որ շինարարությունն ավարտվել է, բայց տեղում պարզվում է՝ գույքը տեղ չի հասել։ «Կամ պարզվում է՝ շինարարությունն ավարտվել է, բայց հոսանքը չեն միացվել, կամ շինարարությունն ավարտվել է, գույքը հասել է, հոսանքը միացրել են, բայց ջուր չկա։ Կարող եմ շարունակել, իմ համար շահագործման ժամկետն այն է, երբ աշակերտները մտնում են այնտեղ, բայց նրանց էվակուացնելու խնդիր չի առաջանում։ Հասկանում եմ, որ ընթացակարգերը կարևոր են, բայց միշտ չէ, որ կյանքն են նկարագրում, հիմա Ջրառատի դպրոցը երբ կարող ենք գնալ տեսնել, որ արդեն լիարժեք աշխատում է»։

Անդրեասյանը պատասխանեց, որ այս տարվա ապրիլի 30-ին։

Փաշինյանը նշեց, որ պետք է գնանք ու համոզվենք, որ ամեն բան արված է։ «Չպետք է լինի այնպես, որ գնում ենք, ու մեզ անընդհատ համոզում, որ, լավ, էս մի բանն էլ չնկատենք, ու մյուսն էլ չնկատենք, այս կուլտուրայից պիտի դուրս գանք։ Վստահ եմ, որ թղթերի մեջ մի բան է գրված, տիկին Անդրեասյանն այլ բան է բարձրաձայնում, քանի որ դառը փորձ ունի»։

Աղբյուր` Փաստինֆո