Փաստ ինֆո

Շարունակում են պարտվողական քաղաքականությունը և ուզում են ամեն կերպ ժողովրդին ապացուցել, որ մենք չենք կարող մեզ պաշտպանել, հակառակորդն ինչ ցանկանա՝ կանենք։ Վախի ազդեցության, հակառակորդի լկտիության համար դա պարարտ հող է։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը՝ անդրադառնալով ՀՀ պետական սահմանն ապօրինի հատած ադրբեջանցուն որպես «բարի կամքի դրսևորում» Ադրբեջանին վերադարձնելու իշխանությունների որոշմանը։

Հիշեցնենք, որ փետրվարի 28-ին ժամը 05:15-ի սահմաններում, Սյունիքի մարզի Տեղ համայնքի սահմանային հատվածում հայ-ադրբեջանական շփման գիծը հատել է ադրբեջանական զինված ուժերի զինծառայող, ով զինված է եղել ԱԿՄ տիպի ինքնաձիգով ու 1 պահատուփով: Վերջինս վնասազերծվել է ՊՆ զինծառայողների կողմից: Ընդ որում, ադրբեջանցին պետական սահմանը հատել է ծառայակցի հետ, սակայն վերջինս դիմել է փախուստի։ Մինչ ՀՀ պատկան մարմինները պատշաճ տեղեկություն կփոխանցեին, ադրբեջանական ԶԼՄ-ները շտապեցին ադրբեջանցի սահմանախախտին ներկայացնել որպես մոլորված զինծառայող։

ՔԿ-ում նախաձեռնվել էր քրեական վարույթ՝ Ադրբեջանի Հանրապետության զինված ուժերի զինծառայող Ռուսլան Էլդանիս-Օղլու Փենախովի կողմից 2024թ. փետրվարի 28-ին դիվերսիայի փորձ, այլ անձանց կյանքի համար վտանգավոր եղանակով, ինչպես նաև ազգային, կրոնով պայմանավորված ատելության, անհանդուրժողականության և թշնամանքի շարժառիթով սպանության փորձ կատարելու, ապօրինի կերպով հրազեն և ռազմամթերք կրելու և փոխադրելու, հրազենի և ռազմամթերքի մաքսանենգության և ՀՀ պետական սահմանն ապօրինի հատելու դեպքերի առթիվ ու անգամ հայտարարվեց նրա ձերբակալության մասին։ ՀՀ իշխանությունները, սակայն, որոշեցին դիվերսանտին օր առաջ հանձնել Ադրբեջանին՝ անգամ չսպասելով դատական ակտի։ Երեկ ՀՀ ՔԿ-ն հայտնեց, որ որոշում է կայացվել դադարեցնելու քրեական հետապնդումն ադրբեջանցու նկատմամբ, իսկ ՀՀ ԱԱԾ-ն էլ հայտնեց, որ որպես բարի կամքի դրսևորում որոշել են վերադարձնել ադրբեջանցուն։ Ընդ որում, սա այն դեպքում, երբ Ադրբեջանում դեռևս գերության մեջ են պահվում հայորդիներ՝ անգամ 44-օրյա պատերազմի և դրանից հետո գերեվարման դեպքերով և դիվերսանտ ադրբեջանցուն որոշել են վերադարձնել՝ առանց գոնե մեկ հայ ռազմագերու վերադարձի։ Վազգեն Սարգսյանի ծննդյան օրը դիվերսանտը վերադարձվեց Ադրբեջանին։

Մանվել Եղիազարյանի գնահատմամբ՝ սա պարտվողական քաղաքականության շարունակությունն է»։

«Սա պարտվողական քաղաքականության մի մասն է, շարունակությունն է։ Մարդիկ ուզում են ամեն կերպ ասել, թե «Ադրբեջանի կամակատարն ենք, այս հողերն իրենց հողերն են, ոչ թե մերը»։ Օրինակ՝ տղաները մտել էին Ոսկեպար, վռնդել էին տղաներին՝ ասելով, որ սա մեր գյուղը, հողը չէ։ Դեպքը երկու-երեք օր առաջ է եղել։ Հիմա էլ սա է։ Ամեն կերպ անում են, որ ժողովուրդը սուս ու փուս անի այն, ինչ ուզում են՝ խեղճանալը, հակառակորդի առաջ ծնկի գալը, վաղը կարող է թուրքերը լկտիանան, գան մտնեն՝ մարդկանց սպանեն, կանանց նեղացնեն, ինչպես եղել է, նրանց էլ են ազատ արձակել։ Այդպես կամաց-կամաց մաշելու է դիմադրողականությունը՝ մեր հասարակության։ Դա է պատճառը, որ այդպես անվերապահորեն ազատ են արձակում»,- նշեց մեր զրուցակիցը։

Դիտարկմանը, որ ավելի վաղ գոնե գերիների փոխանակման հարց էր բարձրացվում, հիմա դա էլ չարվեց, Եղիազարյանն արձագանքեց․ «Գիտեք, այսօր թելադրողի դերում Ադրբեջանն է, նա է թելադրում ամեն ինչ, մերոնք էլ՝ սուս ու փուս կատարում են։ Ասել է՝ ազատ արձակեք, նրանք էլ՝ ազատ են արձակել։ Այնպիսի իրավիճակ է հասունացել, որ անդունդի եզրին ենք կանգնած, հասկանում ե՞ք, որ Հայաստանում ոչ մի քաղաքացի պաշտպանված չէ՝ ոչ սահմանամերձ գոտիներում, ոչ Երևանում։ Կարող են գալ և Երևանում հայ սպանեն, մեկ-երկու ամիս անց մեր գերիներից մեկին բաց կթողնեն, մենք էլ կհանձնենք ադրբեջանցուն, կտանեն իրենց երկիր։ Սա ժողովրդի վախը բռնելու միջոց է, որ ոչ մեկդ ձեր տանը պաշտպանված չեք։ Սա են ուզում անել»։

Հեղինակ՝ Իզաբել Սահակյան

Աղբյուր` Փաստինֆո