Փաստ ինֆո

Սպարապետի ժամանակ մենք կարողացել ենք ազատագրել մեր հայրենիքի մի մասը, որը հակառակորդի ձեռքին էր. այսօր «Երկրապահը» նույն գործն է անում, 44-օրյա պատերազմից մինչ օրս մենք պետական սահմաններն ենք պահում: Այսինքն, մենք մեր գործն ենք անում։ Այս մասին Վազգեն Սարգսյանի ծննդյան 65-ամյակի առիթով Եռաբլուր պանթեոն այցի ընթացքում լրագրողների հետ զրույցում ասաց ԵԿՄ նախագահ Սասուն Միքայելյանը:

«Ես ուզում եմ դիմել ժողովրդին, որ այսօրվա ծանր վիճակում թե արտաքին քաղաքական, թե խոշոր տերությունների վերադասավորումների ժամանակ, հատկապես մեր տարածաշրջանում պետք է մի քիչ խելոք լինենք, համախմբված լինենք, որ հետագայում ավելի մեծ դժվարությունների չհանդիպենք»:

Հարցին՝ ի՞նչ է նշանակում խելոք լինել, թշնամու կրակոցին չպատասխանե՞նք՝ նա պատասխանեց. «Թշնամու կրակոցի հետ դուք գործ չունեք, թշնամու դեմ կանգնած է մեր բանակը, երկրապահը, տարբեր կառույցներ: Պետք չի տեղին-անտեղին ապատեղեկատվություն տարածել, ամեն մեկը մի բան խոսի, պետք է համախմբված լինենք»:

Անդրադառնալով Ներքին Հանդում ստեղծված իրավիճակին՝ Միքայելյանն ասաց. «Արդեն 3-4 տարի է՝ երկրապահը Ներքին Հանդում է, ուղղակի չեմ ուզել, որ ամեն ինչ էսպես տարածվի: Միշտ ասում են՝ երկրապահն ո՞ւր է, մեծ թվաքանակով կանգնած է երկրապահը պաշտպանական գծի ողջ գրեթե երկարությամբ: Կրակոց լինելում է, մենք էլ պատասխանում ենք»:

Դիտարկմանը, թե իշխանությունները Ներքին Հանդում տեղի ունեցածի առնչությամբ հայտարարեց, որ կհետաքննեն և կպատժվեն նրանք, ովքեր խախտել են սադրանքների չգնալու հրամանը՝ Միքայելյանը պատասխանեց, որ դա ասվել է ընդհանուր արտաքին քաղաքականության համար։ «Բայց էդ տղուն բռնե՞լ են: Էդ տղեն իմ հետ հետ եկավ Հանդից: Այ հենց էդ է, որ ասում ենք, թե պիտի համախմբված լինենք։ Դուք Երկրապահի համար մի մտահոգվեք։ Մեր կյանքը միշտ էլ վտանգի տակ է եղել, էդպես էլ կշարունակվի, էդ մեր խաչն է, դուք անհանգիստ մի եղիր։

Անդրադառնալով Տեղ գյուղի տարածքում հայտնաբերված ադրբեջանցուն, որպես բարի կամքի դրսևորում՝ ադրբեջանական կողմին վերադարձնելու մասին հայտարարությանը, Սասուն Միքայելյանն ասաց. «Մենք էլ էնտեղ գերիներ ունենք, դա իմ խնդիրը չի, իմ խնդիրը սահման պահելն է: ԱԱԾ-ն հասկանում է՝ ինչ է անում։ Ամեն ինչ մեջ քթներդ մտցնում եք»:

Աղբյուր` Փաստինֆո