Փաստ ինֆո

Դատավոր Դավիթ Գրիգորյանի աշխատասենյակը ՀՔԾ քննիչի կողմից կնիքելու և առանց դատարանի որոշման խուզարկություն կատարելու առնչությամբ դատավորի իրավունքների խախտումն արձանագրվելուց հետո ավելի քան երեք տարի անց քննիչին պատասխանատվության ենթարկելու հարց դեռևս չի բարձրացվել, իսկ դատարանը ձգձգում է այդ հիմքով խուզարկությամբ ձեռք բերված տվյալները որպես անթույլատրելի ապացույց ճանաչելու գործընթացը, թեև դատական ակտը համարվում է օրինական ուժ ունեցող՝ հենց հրապարակման պահից։ Դավիթ Գրիգորյանի իրավունքների խախտումն արձանագրող դատական ակտն անփոփոխ է թողնվել Վերաքննիչ դատարանում, ապա՝ դատախազության կողմից բողոքարկվել Վճռաբեկ դատարան և, ինչպես «Փաստինֆո»-ի հետ զրույցում հայտնեց փաստաբան Գեորգի Մելիքյանը՝ շուրջ երկու տարի գտնվում է Վճռաբեկ դատարանում՝ քնեցված վիճակում։

Հիշեցնենք, որ Դավիթ Գրիգորյանն այն դատավորն է, որը 2019թ. մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը, որպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։

Այս որոշումներից հետո Դավիթ Գրիգորյանի նկատմամբ իրականացվեցին դատավարական գործողություններ ու մեղադրանք առաջադրվեց ՀՀ քրեական օրենսգրքի 314-րդ հոդվածի 1-ին մասով ՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու հատկանիշներով։ Քրեական գործով մեղադրյալի կարգավիճակում է նիստերի նախկին քարտուղար Գոռ Վարդանյանը, որը մեղադրվում է իբրև օժանդակության մեջ։

Թե՛ առաջին ատյանի, թե՛ վերաքննիչ դատարաններն արձանագրել են Դավիթ Գրիգորյանի իրավունքների խախտումը՝ կապված նրա գործառույթային անձեռնմխելիությունը չհաղթահարելու, առանց դատարանի որոշման նրա աշխատասենյակում խուզարկություն իրականացնելու, կնիքելու հետ։ Թեև իրավունքների խախտումն արձանագրող դատական ակտերն օրինական ուժ են ստացել հենց հրապարակման պահից, վարույթն իրականացնող մարմինը գործը կարճելու փոխարեն դատարան է ուղարկել։ Հենց դատաքննության նախապատրաստման փուլում Երևանի ընդհանուր իրավասության դատարանը՝ դատավոր Դավիթ Բալայանի նախագահությամբ, կարճել է գործի վարույթը՝ մատնանշելով դատավարական ու քրեաիրավական նորմերի խախտման փաստը։ Այս որոշումն անփոփոխ է թողնվել վերաքննիչ դատարանի կողմից, սակայն դատախազության բողոքը Վճռաբեկ դատարանը բավարարել է՝ գործն ըստ էության քննության ուղարկելով Հակակոռուպցիոն դատարան, որտեղ գտնվում է ապացույցների հետազոտման փուլում։ Այս որոշմանը զուգահեռ՝ Վճռաբեկ դատարանում «սառեցված» վիճակում պահվում է Դավիթ Գրիգորյանի իրավունքների խախտումն արձանագրող դատական ակտերի դեմ բողոքը։

Հեղինակ՝ Իզաբել Սահակյան

Աղբյուր` Փաստինֆո