Փաստ ինֆո

Ցանկացած երկու միավորի, այդ թվում՝ երկրների հարաբերությունների վատթարացումը միշտ ունենում է բացասական ազդեցություն և հետևանքներ՝ լինի կարճաժակմետ, թե երկարաժամկետ կտրվածքով։ Անգամ անձնական դաշտում, երբ 2 մարդու միջև հարաբերությունների լարում է տեղի ունենում, անգամ եթե մեկը թույլ է, մյուսը՝ ուժեղ, միևնույն է, դա բացասական ազդեցություն է ունենում, նույնը միջպետական հարաբերությունների դեպքում է։ Այս մասին «Փաստինֆոյի» հետ զրույցում ասաց ՀՀ ԱԺ նախկին պատգամավոր Թևան Պողոսյանը՝ անդրադառնալով Հայաստան-Ռուսաստան հարաբերությունների վատթարացմանը։

«Օրինակ Հայաստանը հիմա գնում է Թուրքիայի հետ հարաբերությունների կարգավորման, բայց այդ թուրքերը չէի՞ն մեզ ցեղասպանել, թե՞ 1915-ը ուրիշ ազգ է արել։ Ադրբեջանի հետ ենք գնում հարաբերությունների կարգավորման, բայց այդ ադրբեջանցիք չե՞ն սպանել է մեր տղաներին, ադրբեջանցիները չե՞ն մեր հողերը, մեր տները զավթել, նստել մեր տներում, իսկ մենք հիմա իրենց հետ պատրաստ ենք խաղաղության գնալ։ Այսինքն՝ երբ 2 հոգի լարված հարաբերություններ են ունենում, դա միշտ էլ վատ է»,- նշել է գործիչը։

Հիշեցնենք, որ օրեր առաջ ՀՀ վարչապետ Նիկոլ Փաշինյանը ԱԺ ամբիոնից հայտարարել էր, որ ՀԱՊԿ-ում ՀՀ մասնակցությունն այսօր դե ֆակտո է սառեցված՝ չբացառելով նաեւ դե յուրե սառեցնելը, ինչին արձագանքելով էլ ՌԴ արտգործնախարար Սերգեյ Լավրովը հայտարարել է, որ սպասում են ՀԱՊԿ-ի առնչությամբ Հայաստանի վերջնական դիրքորոշմանը։ Թեւան Պողոսյանն արձանագրել է՝ եթե հարաբերությունները վատանում են ու մարդիկ անցնում են հանրային դաշտում իրար հարվածներ հասցնելուն, ապա սա ոչ մի դրական բանի չի կարող բերել, չի կարող մի բանը, որ կոչվում է հարաբերությունների վատթարացում՝ բերել դրական բանի։

«Ընդ որում՝ խոսքը նույնիսկ ոչ բարեկամ, ոչ դաշնակից պետության հետ հարաբերությունների վատթարացման մասին է, իսկ Ռուսաստանի նման երկիր թշնամի ունենալը խնդիր է, ընդ որում՝ այնպես չէ, որ հարցեր չկան Ռուսաստանին, նույնիսկ ոչ այնքան շատ բարեկամները փորձում են խնդիրները բանակցությունների միջոցով հարթել։ Այդ բանակցային գործընթացը կարող է լինել ոչ հանրային դաշտում, պետք է կարողանալ աշխատանքային սենյակներում հարցերը լուծել, ու այնպես լուծել, ելքեր, ճանապարհներ գտնել, եթե ճանապարհներ, ելքեր չենք գտնելու, ապա ուրիշներն են դա անելու»։

Դիտարկմանը , թե արդյոք Հայաստանը շարունակում է մնալ ՀԱՊԿ-ում, քանի որ ԵԱՏՄ-ից պատրաստ չէ դուրս գալ՝ նա ասաց, որ անհնար է որևէ տնտեսական համագործակցություն՝ առանց քաղաքական համագործակցության։ «Ես չեմ տեսնում որևէ դեպք, երբ առանց քաղաքական համագործակցության լինի տնտեսական համագործակցություն։ Արդյո՞ք, ԵՄ-ին պետությունները տնտեսականի՞ համար են անդամակցում, պատրաստ են իրենց երկրի իշխանության որոշակի հատված հանձնել հանուն տնտեսական համագործակցության, թե՞ քաղաքական որոշում է դա։

Տնտեսական համագործակցություն չի լինելու, առանց քաղաքականի»,- արձանագրել է նա։

Նրա դիտարկմամբ՝ ռուսական կողմից արդեն կան որոշակի արձագանքներ, հենց տնտեսական բնույթի սահմանափակումների տեսքով։

«Երբ ձևավորվում են բարի դրացիական հարաբերությունների բախումային դաշտ, ապա ինչ-որ մեկ ուրիշ երկիր է շահելու այդ բախումից ու մեր պարագայում այդ մեկը լինելու է մեր թշնամին, որը և Ռուսաստանի հետ էլ ավելի սերտ հարաբերություններ է ունենալու և ստանալու են լրացուցիչ լծակներ մեր ճնշելու»։

Ինչ վերաբերում է ԵԱՏՄ-ից հեռանալու հետևանքներին՝ նա նշեց, թե բավական է դիտարկել և հասկանալ, թե որքան է մեր տնտեսությունը կապված ԵԱՏՄ-ի հետ, օրինակ, ինչ տեղի կունենա մեր տնտեսության հետ, եթե բազմաթիվ ապրանքների գներ հավասարվեն միջազգային գներին։

Աղբյուր` Փաստինֆո