Փաստ ինֆո

1100 քաղաքացու շրջանում իրականացված հարցման մասնակիցների 42 տոկոսը կարծում է, որ հայ-ռուսական հարաբերությունների լիակատար խզումը ընդհանրապես չի բխում Հայաստանի և հայ ժողովրդի ռազմավարական շահերին, 16.1 տոկոսը կարծում է, որ ավելի շուտ չի համապատասխանում Հայաստանի և հայ ժողովրդի շահերին։ 23.2 տոկոսը կարծում է, որ հայ-ռուսական հարաբերությունների լիակատար խզումը բխում է Հայաստանի և հայ ժողովրդի շահերին, շուրջ 13.9 տոկոսը կարծում է, որ ավելի շուտ համապատասխանում է։

«GALLUP International Association»-ի Հայաստանում լիիրավ անդամ ԷՄ ՓԻ ՋԻ ՍՊԸ տնօրեն Արամ Նավասարդյան այսօր հրավիրված ասուլիսում հայտնեց, որ ստացվում է, որ հարցվածների 58 տոկոսը կարծում է, որ հայ-ռուսական հարաբերությունների խզումը չի համապատասխանում մեր շահերին։

Հարցին, թե «Հայաստանը պե՞տք է շարունակի անդամակցել ՀԱՊԿ-ին, թե պետք է ձգտի միանալ ՆԱՏՕ-ին»՝ 40.3 տոկոսը նշել է, որ պետք չէ որևէ կառույցի անդամակցել, պետք է լինել չեզոք երկիր։

28 տոկոսը կարծում է, որ պետք է շարունակել անդամակցել ՀԱՊԿ-ին, 22.5 տոկոսը կարծում է, որ պետք է ձգտել անդամակցել ՆԱՏՕ-ին, հարցին դժվարացել է պատասխանել 9,2 տոկոսը։

Հարցին, թե արդյոք «ՀՀ իշխանությունը ձեռնարկում է բավարար քայլեր՝ ադրբեջանական բանտերում գտնվող Արցախի ռազմաքաղաքական իշխանություններին հետ վերադարձնելու համար»՝ միանշանակ այո է պատասխանել հարցվածների 13.5 տոկոսը, 12.4 տոկոսը պատասխանել է ավելի շուտ այո, 15 տոկոսը կարծում է, որ ավելի շուտ ոչ և միանշանակ՝ ոչ պատասխանել է 44.5 տոկոսը։ Այսինքն, 59 տոկոսը կարծում է, որ ՀՀ իշխանությունները բավարարար ջանք չեն գործադրում այդ ուղղությամբ։

Աղբյուր` Փաստինֆո