Փաստ ինֆո

Հայաստանը պատրաստ է և անում է հնարավորինս՝ խաղաղության պայմանագրի համաձայնեցված սկզբունքները կյանքի կոչելու համար։ Նույնը, սակայն, չենք տեսնում Ադրբեջանի կողմից։ Այս մասին Անթալիայի դիվանագիտական ֆորումի ընթացքում հայտարարել է ԱԺ փոխնախագահ Ռուբեն Ռուբինյանը։

Ռուբինյանը նշեց, որ խաղաղության բանակցությունները չեն էլ դադարեցվել, Արցախում տեղի ունեցած դեպքերից հետո չեն եղել հանդիպումներ՝ երկրների ղեկավարների միջև, բայց կողմերը մշտապես փոխանակվել են խաղաղության պայմանագրի վերաբերյալ մեկնաբանություններով։

Ռուբինյանը նշել է, որ Հայաստանն ու Ադրբեջանն արդեն կարողացել են համաձայնության գալ խաղաղության հիմնարար սկզբունքների շուրջ՝ դա Ալմաթայի հռչակագրի հիման վրա միմյանց տարածքային ամբողջականության ճանաչումն է, այս հռչակագրի հիման վրա պետական սահմանի սահմանազատում և սահմանագծումն է, տարածաշրջանային հաղորդակցությունների ապաշրջափակումը՝ հիմնվելով ինքնիշխանության սկզբունքի վրա։

«Եթե մենք կարողանանք համաձայնագրի մեջ ներառել երկու երկրների ղեկավարների կողմից արդեն համաձայնեցված սկզբունքները, ապա խաղաղությունը կարող է շատ արագ հասնել, ցավոք, ինչը դեռևս չի արվել։ Մեր կողմից մենք անում ենք հնարավորը՝ խաղաղության հասնելու համար, սակայն Ադրբեջանի կողմից բավարար ջանքեր չենք տեսնում։ Հուսով ենք, որ սա կփոխվի: Մնում է ավարտել տեխնիկական աշխատանքները։ Հույս ունենք, որ կկարողանանք անհրաժեշտ արդյունքների հասնել»,- նշեց Ռուբինյանը։

Նա նաև ասել է, թե Հայաստանը տարածքային պահանջներ չունի Ադրբեջանից։

Աղբյուր` Փաստինֆո