Փաստ ինֆո

Բեռլինյան հանդիպումները չի կարելի բանակցություններ անվանել, ես կարծում եմ, որ այս ամենը այլ տրամաբանության մեջ է։ Այս մասին «Փաստինֆոյի» հետ զրույցում ասաց ԲՀԿ քաղխորհրդի անդամ, ՀՀ ԱԺ նախկին պատգամավոր Արման Աբովյանը՝ անդրադառնալով փետրվարի 28-29-ը Բեռլինում Հայաստանի և Ադրբեջանի արտաքին գործերի նախարարների միջև տեղի ունեցած բանակցություններին։

Ինչպես արդեն հայտնել ենք՝ բանակցությունների արդյունքներով ՀՀ ԱԳՆ-ն հայտարարեց, որ քննարկել են «Հայաստանի և Ադրբեջանի միջև խաղաղության և միջպետական հարաբերությունների հաստատման վերաբերյալ» երկկողմ համաձայնագրի նախագծի դրույթների տեսակետները։ Արտահայտվել է փոխադարձ համաձայնություն՝ շարունակել բանակցությունները բաց հարցերի շուրջ։

Արման Աբովյանի գնահատմամբ՝ «ունենք մի իրավիճակ, երբ Ադրբեջանը նախապայման է դրում սրանց առջև, իսկ այս իշխանությունը ոչ թե մտահոգված է նրանով, թե ինչպես այդ պայմանները չկատարի, այլ թե ինչպես դրանք հրամցնի հասարակությանը»։

Ընդ որում, ինչպես նշել է գործիչը, հիմա բանակցություններ են ընթանում ոչ թե Հայաստանի և Ադրբեջանի միջև, այլ բանակցություններ են ընթանում, թե ինչպես ձևավորեն նոր կոնֆիգուրացիա տարածաշրջանում, որտեղ Իրանի, Ռուսաստանի և մասնակի Չինաստանի դերակատարությունը կտրուկ կնվազի։ «Այսինքն, սա է բանակցային գործընթացի թիրախը»,- ընդգծել է նա։

Աբովյանի խոսքերով՝ հիմա խնդիրը նրանում է, թե ով է վերահսկելու պայմանական ասած՝ Հայաստանի հիմնական լոգիստիկ ուղիները։

«Հայասանի գործող իշխանությունները կողմնակից են արևմտյան թևին, Թուրքիան ու Ադրբեջանն իրենց տեսլականն ունեն, ամերիկյան կողմն՝ իր տեսլականն ունի։ Այսինքն, անհամաձայնությունները կամ քննարկումները, ոչ թե Հայաստանի հետաքրքրությունների շուրջ են, այլ ինչպես սպասարկել այս կամ այն աշխարհաքաղաքական կենտրոնի հետաքրքրությունները։ Այսինքն, ես չեմ տեսնում որևէ գործընթաց, որը միտված է ՀՀ շահերի պաշտպանությանը, հակառակը։ Սա ակնհայտ է, քանի որ Հայաստանի հիմնարար շահերն արդեն ոտնահարված են, խոսքը Արցախի լիակատար հանձնման և դրա լեգիտիմացման գործընթացի մասին է, որին այս իշխանությունը համաձայն է և կոնսենսուս ունի Թուրքիայի ուԱդրբեջանի հետ։ Երկրորդը՝ ՀՀ ինքնիշխան տարածքների հանձնումն է, որն արդեն իսկ այս իշխանությունները մասնակի արել են՝ անունը դնելով ինչ-որ անկլավներ։ Ընդ որում՝ տարօրինակ զուգադիպությամբ այդ անկլավները հայտնվել են Հայաստան -Վրաստան և Հայաստան Իրան ճանապարհների վրա»,- արձանագրել է մեր զրուցակիցը։

Աբովյանն ընդգծեց, որ բանակցային սեղամի մի կողմում հավաքական արևմուտքն է, Թուրքիան և Ադրբեջանը, մյուս կողմում՝ Հայաստանը միտումնավոր մենակ է մնացել իր շահերը պաշտպանելու համար։

«Իրականում հռետորաբանությունը մի բան է, մեկ այլ բան է, որ Եվրոպական հանձնաժողովը Ադրբեջան հետ ստորագրում է ստրատեգիկ ռազմավարական էներգետիկ խարտիա, որը հիմքն է Ադրբեջանի տնտեսության զարգացման։ Այստեղ ունենք իրար հակասող պրոցես, բայց պետք է տեսնենք, թե վերջում ինչ է իրականանում։ Մի կողմից Հայաստանն, այո, միտումնավոր մենակ է մնացել իր շահերը պաշտպանելու գործում, մյուս կողմից էլ այն մարդիկ, ովքեր ի պաշտոնե պետք է պաշտպանեն ՀՀ շահերը՝ զբաղված են որոշակի կոնֆիգուրացիաներ ձևավորելով, որի շրջանակներում սպասարկելով այս կամ այն աշխարհաքաղաքական կենտրոնի շահերը կերկարացնեն իրենց քաղաքական ներկայությունը հայկական իշխանական վերախավում, ընդ որում՝ խոսքը ոչ թե անձերի մասին է, այլև համակարգի»,- եզրափակել է Աբովյանը։

Աղբյուր` Փաստինֆո