Փաստ ինֆո

Նոր Նորքի վարչական շրջանի ղեկավարը պնդում է, որ որեւէ պարտավորություն չունեն բնակարանով ապահովելու կամ փոխհատուցելու այն բնակիչներին, որոնց գույքը՝ հողամասն ու տունը, առանց զգուշացման այսօր քանդվել է Երեւանի քաղաքապետի որոշմամբ։

Ինչպես արդեն տեղեկացրել ենք՝ այսօր վաղ առավոտից քաղաքապետարանի աշխատակիցները սկսել են քանդել Գայի պողոտայի սկզբնամասում՝ Թաթուլ Կրպեյանի անվան այգու մոտ գտնվող շինությունները։

Բնակիչները պնդում են՝ տարիներ շարունակ գույքահարկ են վճարել, խնամել ու մշակել այդ տարածքը, որոշներն ունեն նաեւ սեփականաշնորհման վկայականներ, սակայն այսօր քաղաքապետարանի աշխատակիցները, առանց որեւէ նախազգուշացման եւ օրինական փաստաթուղթ ներկայացնելու սկսել են քանդման գործընթաց իրականացնել։ Ընդ որում՝ նրանց հավաստմամբ՝ միայն բնակիչների պահանջից հետո քաղաքապետարանի աշխատակցները հեռացել են ու որոշ ժամանակ հետո վերադարձել որոշումով։

Նոր Նորքի վարչական շրջանի ղեկավարը չի հերքում, որ բնակիչներից ոմանք տվյալ տարածքը տիրապետում են մի քանի տասնամյակ, սակայն պնդում է, որ նրանք անօրինական են զավթել։ «Փաստացի տուն չունեն, տարիներ շարունակ զավթել են»,- լրագրողների հարցապնդումներին ի պատասխան հայտարարել է վարչական ղեկավարը եւ ընդգծում, որ որեւէ պարտավորություն չունեն՝ նրանց ապահովելու բնակարանով։
«Այսինքն՝ եթե վաղը մոստի տակն ապրող երեք հոգի լինի, մոստը քանդվի, ես պարտավո՞ր եմ նրանց բնակարանով ապահովել»,- հայտարարեց վարչական շրջանի ղեկավար Տիգրան Տեր-Մարգարյանը։

Ըստ նրա՝ այսօր բնակարան է տրամադրվել մեկ մարդու, որն ունի սեփականության վկայական։
Ավագանու «Մայր Հայաստան» խմբակցության՝ լիազորությունները դադարեցված անդամ Սոնա Աղեկյանը նշում է՝ մարդիկ երկար տարիներ ծառեր են տնկել, բանջարաբոստանային կուլտուրաներ մշակել, գույքահարկեր վճարել, մինչդեռ, չընտրված քաղաքապետը որոշում է կայացրել՝ ամեն ինչ օտարելու՝ առանց քաղաքացիների հետ հանրային լսումներ իրականացնելու, փոխհատուցում նշանակելու, քաղաքացիների իրավունքները խախտում են։

«Բնակիչները նախապես տեղեկացված չեն եղել, ժամանակ տրամադրված չի եղել, միգուցե՝ մարդիկ իրենց գույքը կարողանային հեռացնել, եթե որոշումն օրինական լիներ, որոշումը գուցե համաձայնեցվեր»,- ասաց Աղեկյանը՝ հավելելով, որ եթե պնդում են, թե այդ շինությունները, տարածքներն ապօրինի են եղել, ինչու են գումարներ գանձել մարդկանցից՝ ապօրինի հողատարածքների համար, իսկ եթե մարդը բարեխղճորեն վճարել է, 10 տարուց ավել օգտագործել է, տիրապետել է, ապա նա իրավունք ունի որպես սեփականատեր հանդես գալու։ Ավագանու անդամ

Իզաբելա Աբգարյանը «Փաստինֆո»-ի հետ զրույցում ուշադրություն հրավիրեց այն հանգամանքին, որ 60-րդ հոդվածի տակ կան բազում տարածքներ, Երևանում կան թաղամասեր, շինություններ, որոնք ոչ թե փոքր տնակներ են, այլ՝ բարձրահարկ շենքեր, սակայն ոչինչ չի արվել, ակնհայտ է, որ ընտրել են այն տնակները, որոնք խնդիրներ չեն կարող առաջացնել։

Աղբյուր` Փաստինֆո