Փաստ ինֆո

Հայաստանը համաձայն չէ որոշ մարզեր չայցելելու վերաբերյալ դեսպանատների կողմից ժամանակ առ ժամանակ արվող հայտարարությունների հետ, կառավարությունը նաև դիվանագիտական խողովակներով միշտ արտահայտում է իր անհամաձայնություն:

ԱԺ-ում այսօր նման հայտարարությամբ է հանդես եկել Հայաստանի վարչապետ Նիկոլ Փաշինյանը՝ ԱԺ-ում կառավարության հետ հարցուպատասխանին՝ պատասխանելով «Քաղաքացիական պայմանագիր» խմբակցության պատգամավոր Մարինա Ղազարյանի հարցին: Նկատենք, որ քպական պատգամավորի հարցը հնչեցնելիս հիշատակեց միայն ՌԴ դեսպանատան կողմից նախօրեին տարածված հայտարարությունը, թեեւ ԱՄՆ դեսպանատունը եւս պարբերաբար նման նախազգուշացնող հայտարարություններով է հանդես գալիս։

«Մենք, ցավոք, ժամանակ առ ժամանակ տարբեր երկրների դեսպանատների կողմից տարածվող նման հայտարարություններ ենք տեսնում: Իհարկե համաձայն չենք այդ հայտարարությունների հետ: Բոլորս էլ գիտենք Հայաստանի շուրջ ստեղծված անվտանգային միջավայրը, բայց ասել՝ Գեղարքունիքի կամ Սյունիքի մարզ մի այցելեք, որևէ հիմնավորում չունի: Կառավարությունը նաև դիվանագիտական խողովակներով միշտ արտահայտում է անհամաձայնություն՝ նման վերացական արտահայտությունների կապակցությամբ»,-ասաց Փաշինյանը՝ ավելացնելով, որ նաև խնդրում են միջազգային գործընկերներին՝ եթե օպերատիվ բնույթի տեղեկություններ ունեն, որոնք հիմք են դառնում նման հայտարարություններ անելու համար, կիսվել իր հետ:

«Ես չեմ ուզում, որ տպավորություն ստեղծվի, թե չենք գնահատում մեր տարածաշրջանում ստեղծված անվտանգային իրադրությունը; Բայց մյուս կողմից էլ ցանկացած քայլ, որը լարումն ավելացումն է, այդքան էլ ընդունելի չէ»,-ասաց Փաշինյանը՝ հավելելով, որ խոսքը բոլոր դեսպանատների կողմից տարածվող նման հայտարարությունների մասին է:

Աղբյուր` Փաստինֆո