Փաստ ինֆո

ՀՀ վարչապետ Նիկոլ Փաշինյանն այսօր պաշտոնապես հավանական է համարել ՀԱՊԿ-ին Հայաստանի մասնակցությունը դե յուրե սառեցնելը։

«Մենք հարց ենք տվել ՀԱՊԿ-ին և մինչև այսօր այդ հարցի պատասխանը չենք ստացել։ Մեր կարծիքով, այդ հարցի պատասխանի բացակայությունը մինչև հիմա սպառնալիքներ է ստեղծում ՀՀ ազգային անվտանգության և տարածքային ամբողջականության համար»։ Այս մասին ԱԺ-ում կառավարության հետ հարցուպատասխանի ընթացքում ասաց ՀՀ վարչապետ Նիկոլ Փաշինյանն՝ անդրադառնալով «Հայաստան» խմբակցության պատգամավոր Գեղամ Մանուկյանի՝ ՀԱՊԿ-ի հետ հարաբերությունները սառեցնելու հայտարարությանը վերաբերող հարցին։ Պատգամավորն ընդգծեց, որ մենք գործ ունենք ռազմաքաղաքական միավորի հետ, որին միացել ենք ռազմաքաղաքական պայմանագրով, որը վավերացվել է խորհրդարանում և միջազգային պայմանագրերի մասին օրենքի հիման վրա։ «Առնվազն կասեցումը պետք է հիմնավորված լինի, փաստաթղթավորված լինի, խորհրդարանն էլ պետք է տեղյակ լինի դրա մասին, այս ամբողջ պրոցեդուրան կատարվե՞լ է, արդյոք Հայաստանը որևէ քայլ արե՞լ է ՀԱՊԿ-ում հստակություն մտցնելու, կա՞ բանակցային պրոցես, թե խռովված երեխայի պես ամեն մեկը քաշվել է մի անկյուն և սպասում ենք հերթական վտանգավոր իրավիճակին ՀՀ սահմաններին»։

Փաշինյանը հիշեցրեց, որ հարցն այն էր, թե որն է ՀԱՊԿ-ի պատասխանատվության գոտին ՀՀ-ում։ Հարցը ծագել է 2021 թ-ի մայիսի, նոյեմբերի, և 2022 թ-ի սեպտեմբերի իրադարձություններից հետո։

«ՀԱՊԿ-ի մեր գործընկերները հրաժարվել են իրադրությանը գնահատական տալ, ինչը առաջացրել է այս իրավիճակը։ Ինչ վերաբերում է ՀԱՊԿ-ում մեր գործունեության սառեցման մասին հայտարարությանը, դա նշանակում է, որ մենք ՀԱՊԿ-ում չունենք մշտական ներկայացուցիչ արդեն 1 տարի։ Մենք ՀԱՊԿ-ի միջոցառումներին տևական ժամանակ է չենք մասնակցում։ ՀԱՊԿ-ում որոշումների կայացումը չենք արգելափակում, բայց և չենք մասնակցում, որովհետև չունենք այն հարցի պատըասխանը, թե ինչու պետք է մասնակցենք»։

Նա ընդգծեց, որ հայկական կողմում գիտեն այդ հարցի պատասխանը և առաջարկում են այդ հարցի լեգիտիմ պատասխանի տակ ստորագրել և հաստատել պատասխանը։

«ՀԱՊԿ-ը բողոքելու տեղ չի, որ մենք գնանք բողոքենք, մենք կազմակերպության լիարժեք անդամ ենք ու մեր ձայնը չի լսվում, մենք հո ՀԱՊԿ-ում դիտորդ կամ հյուր չենք, լիիրավ անդամ ենք։ Ես այս ամբիոնից ասել եմ, որ ՀԱՊԿ-ը՝ փոխանակ կատարելու իր՝ ՀՀ-ի նկատմամբ պարտավորությունները անվտանգային ոլորտում՝ անվտանգային խնդիրներ է առաջացնում ՀՀ-ի համար և այդ դիրքրոշումը սպառնալիք է ՀՀ ազգային անվտանգությանը։ Այս սպառնալիքի բերումով ՀԱՊԿ-ը՝ ի հեճուկս սեփական պարտավորությունների, անում է ուղիղ հակառակը, հիմա մենք դե-ֆակտո սառեցրել ենք մեր անդամակցությունը, բայց եթե այս պրոցեսը շարունակվի՝ դե յուրե էլ պետք է սառեցնենք»,- ընդգծել է Փաշինյանը։

Աղբյուր` Փաստինֆո