Փաստ ինֆո

ՔՊ-ական պատգամավոր Խաչատուր Սուքիասյանն այսօր առաջարկել է հնարավորություն տալ գործատուներին՝ աշխատանքի ընդունելիս տեղեկանալ տվյալ մարդու խաղամոլության խնդիրների մասին։

«Երբ մարդը դիմում է, որպեսզի իրեն թույլ չտան խաղադրույք կատարել՝ գնում է գրասենյակ, բայց երբ միլիոնով խաղադրույք է կատարում՝ ընդամենը կոճակներ է սեղմում։ Ո՞նց կարող ենք անել, որ այդ կոճակներով նաեւ արգելափակվեն ու ոչ մի անգամ չկարողանա խաղադրույք կատարել։ Միաժամանակ, հնարավո՞ր է, որ պետական մարմնում մարդն աշխատանքի ընդունվելիս ավտոմատ արդեն իրավունք չունենա խաղադրույք կատարել, քանի որ արդեն պետական պաշտոնյա է»,- նշել է Սուքիասյանը դիմելով ՊԵԿ նախագահ Ռուստամ Բադասյանին։

Պաշտոնյայի փոխանցմամբ՝ իրականում բարդ հարցեր են, որոնց պարզ լուծումներ չկան։ «Իրականում, անգամ հաշվետվողականության ձև չունենք, որ այդ հարցերի պատասխանները լինեն։ Այսինքն, չկա միջոց հաշվարկելու, թե որքան է մարդը պարտվել, որքան շահում է ունեցել։

Մենք ստիպված ենք, որոշակի թերի տեղեկությունների վրա հիմնվել։ Այսինքն, հարկ վճարողների կողմից տրամադրված, ոչ թե որովհետև իրենք թերի են տրամադրում, այլ հստակ չէ, որովհետև չենք տեսնում շահումը, պարտված գումարը, այլն»։
Սուքիասյանը նկատեց, որ գուցե պետք է խաղամոլության աստիճան որոշվի, որպեսզի մարդը, որը խաղամոլ է՝ իր աշխատածի որոշակի մասը խաղադրույք է կատարում՝ կարգավիճակ ունենա, որպեսզի պետական մարմինները հասկանան, որ այս մարդու հետ կապված խնդիր կա, քանի որ մասնավոր սեկտորը և ընտանիքներն էլ տառապում են այդ խնդրից։

Բադասյանն ասաց, որ աշխատանքային հարաբերությունների հետ կապված հարցերը առաջինից երկրորդ ընթերցում կքննարկեն։ «Կարծում եմ նման կարգավորումներ հնարավոր է կիրառել և դա հակասահմանադրական չի լինի։ Կա նաև հնարավորություն, որ մարդը դիմի և ասի, որ չի ուզում որևէ խաղային ապարատից օգտվել, եթե ինքը որևէ տեղ գրանցվի, ապա իրեն արգելափակեն, այսինքն, մենք հստակ գիտենք, թե ինչպես դա վերահսկել»,- ասել է Բադասյանը

Մանրամասները՝ տեսանյութում

Աղբյուր` Փաստինֆո