Փաստ ինֆո

ՔՊ-ն չի խառնվել այն հարցերին, թե գործն արդար է, արդար չէ, ով է մեղավոր, ոչ մեղավոր չէ։ Այս մասին լրագրողների հետ զրույցում ասել է ԱԺ նախագահ Ալեն Սիմոնյանը՝ անդրադառնալով իր եղբոր կնոջ նկատմամբ հարուցված քրեական գործին։

«ՔՊ-ն 3 մարդու վերաբերյալ խափանման միջոցը փոխելու համար միջնորդություն է ներկայացրել միայն։ Ես կարծում եմ, որ ՀՀ-ում անընդունելի է, որ դատարանը որոշում է կայացնում, որևէ գործով մանկահասակ երեխայի մոր նկատմամբ խափանման միջոց կալանքն ընտրել այն դեպքում, երբ կան տարբեր միջոցներ։ Գիտեմ, որ խոսակցություն կա, որ էլի է նման դեպք եղել։ Ես առիթից օգտվելով ներողություն եմ խնդրում այն բանի համար, որ չեմ իմացել դրա մասին։ Դա իմ մեղավորությունն է»,- ասել է Սիմոնյանը։

Հարցին՝ ինչ կանեիք, եթե իմանայիք՝ նա պատասխանեց. «Նույնը, ինչ այս դեպքում։ Անկեղծ՝ չեմ իմացել, որ նման դեպք եղել է։ Անկախ նրանից, թե ով է մանկահասակ երեխա ունեցող կինը, որպես խափանման միջոց կալանք ընտրելն անթույլատրելի է, չգիտեմ ինչ դեպք պետք է լինի, որ կալանավորեն»։

Դիտարկմանը, թե կարող էր քաղաքական հրահանգ լինել՝ նա պատասխանեց, որ չի կարծում, որ նման բան է տեղի ունեցել։ «Ամեն դեպքում, կարծում եմ, որ դատարանի այդ որոշումն անթույլատրելի է»։

Հարցին՝ եթե պարզվի, որ իր եղբոր կինը և գործով անցնող մյուսները մեղավոր են, ապա ինչ պետք է լինի՝ նա պատասխանեց, որ եթե պարզվի, որ մեղավոր են, պետք է կրեն համապատասխան պատիժ։ «Բայց ես հավատում եմ, որ նման բան անհնարին է, երբ ծանոթացել եմ այն ամենին, ինչ մեղսագրվում է՝ իմ համոզմունքը ամրապնդվեց»։

Աղբյուր` Փաստինֆո