Փաստ ինֆո

Լևոն Քոչարյանի գործով դատախազը մտերիմ հարաբերություններ ունի Աշոտ Փաշինյանի հետ և պաշտպանել է մեղադրանքը՝ Փաշինյանի առևանգման գործով։ Այս մասին հայտնել է Լևոն Քոչարյանի պաշտպան Ալեքսանդր Կոչուբաևը՝ միջնորդելով վարույթից հեռացնել դատախազ Արթուր Դանիելյանին, որը Լևոն Քոչարյանի գործով ներգրավված է որպես հանրային մեղադրող, իսկ նախաքննության փուլում իրականացրել է հսկողություն։

«Փաստինֆո»-ի հաղորդմամբ՝ դատավոր Կարեն Ֆարխոյանի նախագահությամբ ընթացող նախնական դատալսումներում Սերգեյ Ասատուրովի պաշտպան Արայիկ Ներսիսյանը միջնորդություն ներկայացրեց՝ Ասատուրովի նկատմամբ ընտրված խափանման միջոց բացակայելու արգելքը վերացնելու մասին՝ նշելով, որ իր պաշտպանյալը միջազգային կարգի մրցավար է, հետևաբար, անհրաժեշտություն է լինում արտերկիր մեկնելու։ Միևնույն ժամանակ, պաշտպանը միջնորդեց դադարեցնել քրեական հետապնդումը՝ նշելով, որ մեղադրանքի ուսումնասիրությունից պարզ է դարձել, որ մեղադրանքի հիմքում այն է, որ Սերգեյ Ասատուրովը մյուսների հետ թևանցուկ մոտեցել է ոստիկանության աշխատակիցներին, ինչը խախտում չի դիտարկվում։ Ասատուրովն էլ ավելացրեց՝ ցույցերի ժամանակ թևանցուկ անցնելն արվել է անվտանգության նկատառումներից ելնելով։ Միջնորդության դատարանը կանդրադառնա ավելի ուշ, ըստ հաջորդականության՝ դատարանն անցավ ինքնաբացարկի հարցի քննարկմանը։ Կողմերը հայտնեցին՝ դատավորին ինքնաբացարկի միջնորդութուն չունեն։ Լևոն Քոչարյանի պաշտպան Արամ Վարդևանյանն էլ նկատեց, որ չի ներկայացնում դատավոր Կարեն Ֆարխոյանին բացարկի միջնորդություն, քանի որ դրա «դասական» հիմքերն այս պահին չկան․ « Դատավոր Կարեն Ֆարխոյանը 2021թ․ հունիսին չի մասնակցել որպես պատգամավորի թեկնածու՝ ԱԺ ընտրություններին։ Լևոն Քոչարյանի կալանավորման և երկարացման որոշումը կայացրել է պատգամավորի նախկին թեկնածու Մասիս Մելքոնյանը, որը բազմիցս քննադատական հայտարարություններ է արել Ռոբերտ Քոչարյանի հասցեին։ Դատավոր Կարեն Ֆարխոյանը չի մասնակցել ընտրություններին որպես թեկնածու, քանի որ արդեն դատավոր է եղել այդ ժամանակ»։

Լևոն Քոչարյանի պաշտպանները, սակայն, բացարկի միջնորդություն ունեին՝ դատախազին՝ հիմքում դնելով դատախազ Արթուր Դանիելյանի և Աշոտ Փաշինյանի մտերիմ հարաբերությունները, որն արձանագրվել է նաև ԶԼՄ-ների կողմից։ Մասնավորապես, դատախազ Արթուր Դանիելյանը եղել է նաև Աշոտ Փաշինյանի իբրև առևանգման գործով հանրային մեղադրողը, դատարանում մտերմիկ զրուցել Փաշինյանի հետ, ինչը տեսանկարահանվել է նաև ԶԼՄ-ների կողմից, իսկ այժմ հսկողություն է իրականացնում Լևոն Քոչարյանի գործով․«Ինչպե՞ս ստացվեց, որ Արթուր Դանիելյանն ընտրվեց Լևոն Քոչարյանին մեղադրող դատախազ, երբ նա եղել է նաև Աշոտ Փաշինյանին՝ որպես տուժող՝ մեղադրանքը ներկայացնող դատախազ։ Աշոտ Փաշինյան, Լևոն Քոչարյան եւ նույն դատախազ. ինչպե՞ս է ստացվում»։

Պաշտպան Ալեքսանդր Կոչուբաևը նկատեց՝ կողմնակալության և անկախության հետ կապված խնդիրներ են տեսնում։
Ընդ որում, մինչ բացարկի միջնորդություն ներկայացնելը՝ փաստաբանը հետաքրքրվել է՝ արդյոք դատախազը Փաշինյանի ընտանիքի հետ որևէ առնչություն ունի, ինչին դատախազ Արթուր Դանիելյանը հստակ պատասխան չի տվել, ինչն էլ էլ ավելի է ամրապնդել փաստաբանի կասկածը, որ կողմնակալ վերաբերմունք կարող է լինել։ Պաշտպանության կողմը միացավ միջնորդությանը։

Լևոն Քոչարյանը, միանալով միջնորդությանը, հայտարարությամբ հանդես եկավ՝ նշելով․ «Այս դատական նիստն այս դրվածքով հայտնվում է դատարանում, երբ ես այստեղ եմ նստած, իսկ ինձ ծեծող ոստիկաններն այնտեղ, ու դեռ մի հատ էլ դա պաշտպանող դատախազներ են գտնվում։ Ինչքան էլ փորձենք մարդկանց հիմարի տեղ դնել, բայց մարդիկ նայում են չէ, էդ տեսանյութերը բոլորի աչքի առաջ են, այսպիսի մեղադրանքը դատարան բերող, պաշտպանող ու այս ամեն ինչի տակ մտնող դատախազներ ունենք..., բարոյականության մասին չեմ ուզում խոսել։ Բոլորը հասկանում են, թե ինչ է կատարվում»։
Սերգեյ Ասատուրովը ևս հայտարարությամբ հանդես եկավ՝ կա տեսագրություն, որում ամբողջությամբ արձանագրված է իրենց գործողությունները․ « Չգիտեմ, եթե փաստացի չկա արարք, որը նկարագրված է, ինչպես կարող են մարդուն մեղադրել, ինչ հիմքով»։ Դատախազ Արթուր Դանիելյանն առարկեց միջնորդության դեմ՝ նշելով, որ դրանք անհիմն են։ Դատարանը, լսելով կողմերին, որոշեց դատախազ Արթուր Դանիելյանին վարույթից հեռացնելու միջնորդությունը մերժել։

Հիշեցնենք, որ 2023թ․ սեպտեմբերի 22-ի ոստիկանության ծառայողները  դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։  Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

Հեղինակ՝ Իզաբել Սահակյան

Աղբյուր` Փաստինֆո