Փաստ ինֆո

Կոնդը իրացման գոտի դարձնելը շատ հարաբերական ասված է, դեռ ընտրություններից առաջ Տիգրան Ավինյանը մեր աչքերի մեջ նայելով խոստացել է, որ Կոնդի հետ կապված խնդիրները լուծում են ստանալու, որ բնակիչներն անվճար ստանալու են իրենց վկայականները, մինչդեռ արդեն 2 ամիս է՝ Ավինյանը խուսափում է, մեզ հետ չի հանդիպում։ «Փաստինֆոյի» հետ զրույցում ասաց Կոնդի բնակիչ Նաիրա Երեմյանը՝ նշելով, որ Ավինյանի հետ ցանկանում են հանդիպել՝ հիշեցնելու, իրեն ընտրել են խնդիրներին լուծում տալու, ոչ թե նոր բեռ ավելացնելու համար։

Հիշեցնենք, որ երկուշաբթի օրը տեղի ունեցած գործակարգավարական խորհրդակցության ժամանակ քաղաքապետ Տիգրան Ավինյանը հայտարարել է նոր քաղաքաշինական ծրագրի իրականացման նպատակով Կոնդի տարածքն իրացնելու մասին։

«Նախ, մենք թույլ չենք տա, որ մեզ հետ կադաստրային արժեքով խոսեն, այլ պետք է հաշվարկեն շուկայական գներով։ Մյուս կողմից էլ՝ Կոնդում մշակութային շենքեր կան, եթե այդ մշակութային շենքերը չեն քանդելու, դրանք մնալու են, ապա բնակիչներին էլ շուկայական գին + 15 տոկոս կվճարեն, բնականան է, որ մեզ հետ լուրջ հարցեր չեն առաջանա։ Եթե մեկի մտքով կանցնի, որ ոմն պաշտոնյայի ախորժակը պիտի բացվի կոնդեցիների հաշվին, ապա չարաչար սխալվում են, դա իրենց համար շատ վատ հետևանքների կբերի»,- նշել է տիկին Երեմյանը։

Նրա փոխանցմամբ՝ Կոնդում մի կառուցապատող կա, որը եկեղեցու հարևանությամբ շենք է կառուցում։ Այն դեռ շահագործման չի հանձնվել, բայց ներսում արդեն մարդիկ են ապրում, այդ շենքերում 1 քմ-ն բնակիչներին վաճառվում է 2200-2800 դոլարով, հետևաբար, սա հենց այն արժեքն է, որը կարող է ընդունելի լինել։

«Մենք նաեւ տեղեկություններ ունենք, որ 2012 թ-ին Կոնդը բաժանել էին 7 լոտի և ուզում էին Կոնդը 7 լոտով վաճառել։ Գոյություն ունի կառուցապատման ծրագիր, որի առաջին փուլն է անցել միայն, որտեղ 7 ընկերություն է անցել երկրորդ փուլ, բայց 2-րդ փուլը դեռ չի եղել, այդ ինչի՞ց են վերցրել, որ ասում են, թե ամբողջությամբ իրացնելու են, եթե 2-րդ փուլը չի եղել, մենք այդ մրցույթի ներկայացրած ծրագրերը դեռ չենք տեսել։ Որևէ բան դեռ հստակ չէ, ծրագիր չկա, ծրագրի կետեր չկան, հիմնավորումներ չկան, բայց արդեն իրացումից են խոսում։

Կոնդեցիներն այն մարդիկ չեն, որ ով ուզենա իր համար մի աթոռ քաշի՝ գցի իր տակը, սրտի ուզածն անի, բացառվում է, նման բան չի կարող լինել, թույլ չենք տա»,- նշել է բնակչուհին։

Նա ընդգծեց, որ հիմա ակնկալում են, որ նախեւառաջ իրենց տան սեփականության վկայականները վերջապես կհանձնեն իրենց։

«Քաղաքապետարանը 2020 թ-ից անգործություն է ցուցաբերում ու մեր սեփականության վկայականները չի տրամադրում։ Նոր- նոր սկսում են մեր դիմումների ընթացք տալ։ Դեկտեմբերի 26-ին ավագանին որոշում է ընդունել, ըստ որի՝ մեր սեփականության չափագրման ընթացքում չհաշված, պակաս քառակուսի մետրերը լրացնելու ու նոր վկայականներ ստանալու համար պետք է վճարենք ամբողջ գույքի, այսինքն՝ նաև նախկինում սեփականաշնորհված հատվածի կադաստրային արժեքի 2 տոկոսը։ Մենք այս որոշման դեմ ենք, որովհետև այդ որոշումը մեր փաստաթղթերը սարքելու հետ ոչ մի կապ չունի։ Մենք ինչո՞ւ պետք է դրա համար վճարենք։ Մենք իրենց ձայն ենք տվել, որպեսզի մեր հարցերը լուծվեն, ձայն չենք տվել որ գլխներիս պատուհաս դառնան»,- եզրափակեց մեր զրուցակիցը։

Աղբյուր` Փաստինֆո