Փաստ ինֆո

Այս իշխանությունների քաղաքական գիծն է՝ ամեն գնով փոխել Հայաստանի ստրատեգիական արտաքին քաղաքականությունը։ Այս գիծը նոր չէ, երևի իշխանության գալուց հետո նրանք որդեգրել են հենց այս գիծը և այսօր տեսնում ենք դրա հերթական դրսևորումները։ Այսինքն, փորձում են փոխել արտաքին տերերին։ «ՓաստԻնֆոյի» եթերում ասել է քաղաքագետ Արգիշտի Կիվիրյանը։

Միաժամանակ, բանախոսի դիտարկմամբ, ամեն գնով կատարվում են Ադրբեջանի բոլոր պահանջները։ Ադրբեջանը հենց կարողացավ Արևմուտքի օգնությամբ լուծել Արցախի հարցը՝ թեքվեց դեպի Ռուսաստան, որպեսզի Ռուսաստանի օգնությամբ լուծի այսպես կոչված «Զանգեզուրյան միջանցքի» հարցը։ Չի բացառվում, որ ինչ որ պահի կգնա Արևմուտք՝ իր օրակարգով։

Քաղաքագետը կարծում է, որ փաստացի, Արցախի հանձնումից հետո իշխանությունների հայտարարությունն այն էր, որ կստորագրեն, այսպես կոչված, «խաղաղության պայմանագիրը»։ Պարզվեց, որ այդ պայմանագրի ստորագրմանը դեռ երկար ժամանակ կա և որպես զիջում ներկայացվում է, որ բանակցությունները կշարունակվեն, հետո Ն․ Փաշինյանը հայտարարում է, որ հարձակում է սպասվում։ Չի բացառվում, որ Մյունխենում Ի․ Ալիևը Ն․ Փաշինյանին ասել է, որ իբրև թե այս կամ այն հերթական զիջումը չանելու դեպքում՝ ինչ է սպասվում։

«Սակայն ակնհայտ է, որ այս տարածաշրջան ոչ թե Արևմուտքն է մտնելու, այլ Հայաստանը վերածվելու է Ադրբեջանի կամ Թուրքիայի պրովինցիայի։ Շատերը մտածում են, որ, եթե Ռուսաստանի կամ Իրանի կողմից պատժիչ գործողություններ լինեն, իրենց ամիսներ առաջ զգուշացնելու են։ Սակայն, ոչ ոք չի զգուշացնելու, եթե այս իշխանություններին պատժելու որոշում կայացվեց։ Դա լինելու է շատ կայծակնային և՛ Իրանի կողմից, և՛ Ռուսաստանի»,- ասել է Ա․ Կիվիրյանը։

Մանրամասները՝ տեսանյութում։

Աղբյուր` Փաստինֆո