Փաստ ինֆո

Ես որպես պատգամավոր և խմբակցության անդամ Ուկրաինայի նախագահի այցի մասին տեղեկություն չունեմ, ենթադրում եմ, որ խմբակցության մյուս անդամները նույնպես։ Այս մասին ԱԺ-ում լրագրողների հետ զրույցում ասաց ՔՊ-ական Բաբկեն Թունյանը։

«Ամեն դեպքում՝ դա անհավանական չեմ համարում, ինչ վերաբերում է դրա հետ կապված վտանգներին՝ ես ինձ դրա մասնագետը չեմ համարում, բնականաբար, մտածելու տեղիք կարող է լինել, կարող է չլինել։ Ի վերջո, Ուկրաինայի նախագահը ընտրված ղեկավար է, ինչպես մնացած երկրների ղեկավարները, եթե հատուկ արգելք չկա, կարող են նաև այցելել Հայաստան։ Քանի որ այս պահին որևէ պաշտոնական հայտարարություն չկա՝ թույլ տվեք ես չմեկնաբանեմ այդ հարցը»,- նշել է Թունյանը։

Անդրադառնալով ՀԱՊԿ-ին անդամակցության դադարեցման շուրջ քննարկումներին՝ Թունյանն ասաց, որ եթե նման նպատակ լիներ, ապա կհայտարարվեր։ «Այս պահին վարչապետը նկատի ունի, որ մեր ակտիվությունն այդ կառույցում սառեցված է, ինչը գաղտնիք չի։ Մենք գործողություններին չենք մասնակցում»։

Հարցին, թե արդ դեպքում ինչու ենք շարունակում մնալ ՀԱՊԿ-ում՝ նա պատասխանեց, որ ցանկացած որոշման դեպքում պետք է հաշվարկես, թե քայլ անելու կամ չանելու օգուտներն ու վնասները որոնք են։ «Եթե մի օր կպարզվի, որ դուրս գալը ՀՀ շահերից ավելի շատ է բխում, ապա, բնականաբար մեր պետությունը կառաջնորդվի դրանով։ Եթե մնում ենք այդ կառույցում՝ նշանակում է դեռ իմաստ ենք գտնում դրանում»,- ասել է իշխող ուժի խմբակցության պատգամավորը։

Աղբյուր` Փաստինֆո