Փաստ ինֆո

Ադրբեջանը երբեք էլ չի հայտարարել, թե ինչ սահմաններում է ճանաչում Հայաստանի տարածքային ամբողջականությունը, ինչպես նաև հրաժարվում է սահմանազատման գործընթացի հիմքում դնել 1975 թ-ի քարտեզը, իսկ սա նշանակում է, որ 29,800 քկմ-ն, այն, ինչ նախատեսված էր Ալմաթիի հռչակագրով՝ Ադրբեջանը չի պատրաստվում ճանաչել։

Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցն՝ անդրադառնալով հարցին, թե ինչպես է ստացվում, որ օրեր առաջ Մյունխենում Հայաստանի և Ադրբեջանի ղեկավարները համաձայնություն են ձեռք բերում շարունակել աշխատանքները խաղաղության պայմանագրի շուրջ, վերահաստատում Պրահայում ու Բրյուսելում ձեռք պայմանավորվածությունները, իսկ դրանից օրեր անց ՆԻկոլ Փաշինյանը հայտարարում է, որ Ադրբեջանը պատրաստվում է նոր հարձակման՝ ընդդեմ Հայաստանի։

«Նիկոլ Փաշինյանն ինքն է խախտել իր ձեռք բերած պայմանավորվածությունը։ Իմ ունեցած ստույգ տեղեկատվությամբ՝ խաղաղության պայմանագրով, որը հիմա բանակցվում է Բաքվի և Երևանի միջև, դելիմիտացիայի և դեմարկացիայի հարցը թողնված է պայմանագրի շրջանակներից դուրս։ Հետևաբար, պարզ է, որ եթե Ադրբեջանը դեռևս 1975 թ-ի քարտեզը չի ճանաչում, ապա եթե անգամ խաղաղության պայմանագիրը կնքվի էլ՝ դելիմիտացիայի և դեմարկացիայի շրջանում Ադրբեջանը շատ ավելի ագրեսիվ դիրքերից է հանդես գալու»,- նշել է գործիչը։

Նա ընդգծեց, որ շատ վատ փաստաթուղթ է բանակցում Փաշինյանը՝ լեգիտիմացնելով Ալիևի ագրեսիվ օրակարգը։ «Հետևաբար, ինքն էլ միայն խոսքով է հավատարիմ մնացել Պրահայի քառակողմ հայտարարությանը, ուր մնաց՝ Ալիևը»։

Փաշինյանը, «France24» հեռուստաալիքին տված հարցազրույցում հայտարարելով, որ Ադրբեջանը պատրաստվում է նոր հարձակման Հայաստանի դեմ, միաժամանակ ավելացրել է, թե սառեցրել է ՀՀ անդամակցությունը ՀԱՊԿ-ին։ Այդպիսով ի՞նչ մեսիջ է հղում Ադրբեջանին, արդյոք սա հայտարարություն չէր այն մասին, որ Ալիևը կարող է հանգիստ լինել, քանի որ Հայաստանը որևէ անվտանգային համակարգի մաս չէ՝ Սուրենյանցն ասաց, որ այս հարցազրույցը աբսուրդ էր։ «Հարցազրույցի առաջին հատվածում խոսել մոտալուտ պատերազմի մասին, հետո՝ հարցազրույցի մյուս հատվածում ամեն բան անել, որ թշնամիների թիվ ավելացնի՝ այսպես կարող է վարվել կամ օտարի ծրագիրն իրականացնող իշխանությունը կամ շատ դիլետանտ իշխանություն։ Կարծում եմ, այստեղ 2 բաղադրիչներն էլ առկա են»,- արձանագրել է Սուրենյանցը։

Աղբյուր` Փաստինֆո