Փաստ ինֆո

Կարծում եմ, այն, որ տևական ժամանակ պարոն Շահրամանյանը լռում էր, դրա պատճառը պետք է, որ հայտնի լիներ բոլորիս։ Չնայած այդ մասին չեն բարձրաձայնում, բայց ակնհայտ է, որ Հայաստանի իշխանությունները չեն ցանկանում Արցախյան հարցը դարձնել Հայաստանի և Ադրբեջանի, կամ ավելի ճիշտ՝ Փաշինյանի և Ալիևի հարաբերությունները փչացնելու, ստվերելու գործոն։

Այս մասին «Փաստինֆոյի» հետ զրույցում ասաց քաղաքագետ Ալեքսանդր Մանասյանը՝ անդրադառնալով տեւական լռությունից հետո Արցախի Հանրապետության նախագահ Սամվել Շահրամանյանի այսօր հնչեցրած հայտարարությանն առ այն, որ «Արցախի հարցի վրա կափարիչ են փորձում դնել ու փորձում են փակել այն»։

Դիտարկմանը, թե պատահականություն է, որ Մյունխենյան հանդիպմանը հաջորդեց այդ հայտարարությունը՝ Մանասյանը պատասխանեց, որ նման հարցերում պատահականություններ չեն լինում, ավելին, չի բացառվում, որ ոչ միայն պատահական չէ, այլև օրինաչափ է։

«Բանն այն է, որ դա տեղավորվում է իշխանության կողմից տարվող ընդհանուր քաղաքականության ծիրում։

Գիտեք՝ հիմա Արցախյան հարցն այլևս արցախցիների հարցը չէ, այլ արդեն համահայկական հարց է, նաև սփյուռքահայության հարցն է, դրսում գտնվող ղարաբաղցիների հարցն է, այստեղ գտնվող ղարաբաղցիների հարցն է, դա մեր համակիրների, համախոհների հարցն է, որովհետև Բաքուն փորձում է օրինականացնել բացահայտ կերպով արցախցիների նկատմամբ իրականացրած Ցեղապանությունը։ Մինչդեռ, արցախցիները օրինական հարց են բարձրացնում և օրինական միջոցներով են բարձրացնում դա։

Մենք ազգովի պետք է քայլեր ձեռնարկենք, չպետք է արցախցիներին մենակ թողնենք այդ հարցում, ապա նաև պետք է ճիշտ քայլեր ձեռնարկենք, իսկ ճիշտ քայլերի տեղը իրավունքն է», - նշել է նա։

Մանասյանի խոսքերով՝ մենք պետք է սովորենք իրավունքի լեզվով խոսել։ « Նրանք ովքեր տեսնում են դրանում համազգային խնդիր, պետք է բացահայտ ճշմարտությունն ասեն Ղարաբաղի մասին, իսկ ճշմարտությունը ոչ ոք չի ասում։ Մինչդեռ, տեղեկատվական դաշտում լռությունը բերում է համաձայնության այն բանի, ինչ արվում է այսօր արցախցիների նկատմամբ։ Այդ ճշմարտությունն այն է, որ Լեռնային Ղարաբաղը մերօրյա ադրբեջանական հանրապետությանը միջազգային իրավունքով չի պատկանում, և այս փաստի լույսի տակ ամեն ինչ պարզ է դառնում` և ագրեսորը, և ցեղասպանը։ Ամեն բան պարզ է դառնում, քանի որ այս ճշմարտությունը չի հնչում՝ Ադրբեջանը փորձում է իր արարքները քողարկել իր իրավունքներով, այն դեպքում, երբ ոչ մի իրավունք չունի։ Լեռնային Ղարաբաղը միջազգային իրավունքով չի պատկանում Ադրբեջանին մերօրյա հանրապետությանը։ Սա է միակ ճշմարտությունը։ Սա այն է, ինչ պետք է բարձրաձայնեն այն ուժերը, որոնք վտանգ են տեսնում այն բանում, ինչ արվում է արցախցիների նկատմամբ», - եզրափակել է Մանասյանը։

Աղբյուր` Փաստինֆո