Փաստ ինֆո

Ես չեմ կարծում որ Ռուսաստանը դուրս է մղվում գործընթացներից, Ռուսաստանը բավարար լծակներ ունի մեր տարածաշրջանի երկրների վրա ազդելու համար։ «Փաստինֆոյի» հետ զրույցում նման կարծիք հայտնեց քաղաքական վերլուծաբան Արմեն Բաղդասարյանը՝ անդրադառնալով Մյունխենում տեղի ունեցած եռակողմ հանդիպումից հետո Փաշինյանի՝ Ֆրանսիա և Ալիևի՝ Թուրքիա մեկնելուն։

Վերլուծաբանի դիտարկմամբ` ՌԴ-ն դժգոհ է հայկական կողմի՝ հետևողականորեն դեպի Արևմուտք շարժվելուց, ուստի մեծ է հավանականությունը, որ առաջիկայում ՌԴ-ն ինչ-որ ազդակներ կհղի կամ կհասկացնի, որ չի խանգարի, եթե Ադրբեջանը փորձի լարվածության նոր օջախներ մտցնել հայ-ադրբեջանական սահմանին։

Այնպես, որ ես չեմ կարծում, որ ՌԴ-ն համակերպվելու է այն մտքի հետ, որ բանակցություններն ընթանալու են Արևմտյան հարթակում, ոչ, կարծում եմ, որ առաջիկայում կլինի Ռուսաստանի դերի մեծացում, ընդ որում` հնարավոր է անգամ բացասական իմաստով», - նշել է նա։

Հարցին, եթե Հայաստանի վրա լծակները բավական մեծ են, արդյոք Ադրբեջանի վրա նույնպիսի լծակներ կան և արդյոք օդանավակայանում ՀՀ կողմից հետախուզվող ռազմական հանցագործ ադրբեջանցու ձերբակալությունը այդ լծակների առկայության ցուցադրության մասին էր՝ Ա. Բաղդասարյանը նկատեց, որ ցանկության դեպքում ՌԴ-ն բավական լծակներ ունի Ադրբեջանի վրա ազդելու։

«Օրինակ, բավական է մի հայտարարություն, որ եթե Ադրբեջանը փորձի Հայաստանի տարածքների նկատմամբ ինչ-որ ոտնձգություններ իրականացնել, ապա ՌԴ-ն և ՀԱՊԿ-ն իրենց դաշնակցային պարտավորությունները կկատարի ամբողջ հզորությամբ: Բավական է լինի նման հայտարարություն և Ադրբեջանը ստիպված կլինի հրաժարվել իր կոշտ դիրքորոշումից։ Բայց ՌԴ-ն դա չի անում և դրա դիմաց շատ կոնկրոտ ակնկալիքներ ունի և Ադրբեջանից, և առաջին հերթին Թուրքիայից։

Խոսքը մասնավորապես, Թուրքիայի լոյալության մասին է՝ ռուս-ուկրաինական, Ռուսաստան-հավաքական Արևմուտք առճակատման շուրջ, Մերձավոր Արևելքում խնդիրներ կան և այլն։ Այսինքն` Ռուսաստանը Թուրքիայի հետ կապված բազմաթիվ շատ մեծ շահեր ունի և կարող է հանուն այդ շահերի զոհաբերել Հայաստանի շահերը։

Մի բան որ արդեն արել է ու հիմա էլ շատ պարզ հասկացնում է, որ կշարունակի անել, եթե Հայաստանը շարունակի թեքվել դեպի Արևմուտք և հրաժարվի իր հաղորդակցության ուղիները հանձնել ՌԴ-ին»։

Նրա դիտարկմամբ՝ հիմնական տարաձայնությունը ոչ միայն հայ-ադրբեջանական հարաբերություններին են վերաբերում, այլ, ընդհանրապես, Ռուսաստան, Թուրքիա, Արևմուտք, Իրան հարաբերությունները կապված են Հայաստանով անցնող ճանապարհների վերահսկողության հետ։

«Քանի դեռ այդ հարցը լուծված չի՝ Ադրբեջանը միշտ էլ գայթակղություն է ունենալու դա լուծել ռազմական ճանապարհով, վտանգ կա, որ ՌԴ-ն էլ կարող է ինչ-ինչ պատճառներից ելնելով թույլ տալ, որպեսզի հարկ եղած պահին ուշացումով գա՝ փրկի մեզ և դրա դիմաց պահանջի վերջնականապես երես թեքել Արևմուտքից կամ հրաժարվել փաստացի ինքնաիշխանությունից», - եզրափակել է Արմեն Բաղդասարյանը։

Աղբյուր` Փաստինֆո