Փաստ ինֆո

Կոռուպցիոն սկանդալում հայտնված էկոնոմիկայի նախկին փոխնախարար Անի Իսպիրյանն այս պահին այլևս չի նախագահում ԱՆԻՖ-ի տնօրենների խորհուրդը։ «Փաստինֆո»-ի հրապարակումներից հետո ԱՆԻՖ-ի պաշտոնական կայքից հեռացվել են Անի Իսպիրյանի տվյալները: Իսպիրյանի լիազորություններն են, ի վերջո, կասեցվե՞լ են, թե՞ դադարեցվել, իսկ գուցե, ուղղակի, տվյալներն են հեռացրել`հանրային աղմուկից խուսափելու համար։ «Փաստինֆո»-ն կապ հաստատեց ԱՆԻՖ-ի հետ՝ պարզելու, թե ինչու են հեռացվել Իսպիրյանի տվյալները կայքից, կառույցից, սակայն, չհստակեցրին՝ նշելով․ «Մեր ներքին գործընթացների մասին պարզաբանումների անհրաժեշտություն չենք տեսնում»։ Այս կառույցում, թերեւս, մոռացել են, որ կառավարության կողմից ստեղծված հիմնարկ են ու պարտավոր են գործել ազգային օրենսդրության սահմաններում, իսկ կոռուպցիոն գործով ներգրավված անձի` տնօրենների խորհրդի նախագահի պաշտոնում լինել, չլինել իրենց «ներքին գործընթացները» չեն:

«Փաստինֆո»-ն դիմել է նաև ՀՀ էկոնոմիկայի նախարարությանը, որի լիազորությունների ներքո է գտնվում ԱՆԻՖ-ի խորհրդի անդամներին, նախագահին պաշտոնին նշանակելու կամ ազատելու գործառույթը։ Կառույցից հետաքրքրվեցինք, թե արդյո՞ք դադարեցվել են Իսպիրյանի լիազորությունները՝ ԱՆԻՖ-ի տնօրենների խորհրդի նախագահի պաշտոնում, թե կասեցվել են, արդյո՞ք որոշում կայացվել է, թե ով պետք է փոխարինի նրան, սակայն պատասխան դեռևս չի ստացվել։ Կառույցից պարզաբանում ստանալուն պես այն ևս կհրապարակվի։

Օրեր առաջ Էկոնոմիկայի նախարարությունից հայտնել էին, որ Իսպիրյանի լիազորությունները չեն դադարեցվել՝ նշելով, որ հաշվի են առնում անմեղության կանխավակածը, դեռևս նախաքննություն է ընթանում և առկա չէ օրինական ուժի մեջ մտած մեղադրական դատավճիռ, որը կարող է հիմք լինել աշխատանքից ազատելու համար, ուստի, Անի Իսպիրյանը շարունակում է լինել նախագահ։ Պարզաբանում չէր ներկայացվել, թե բարձր աշխատավարձ ստանալով ինչպես է Իսպիրյանը պաշտոնավարելու տնօրենների խորհրդի նախագահի պատասխանատու պաշտոնում, ներդրումների հետ կապված որոշումներ կայացնելու, երբ սահմանափակված է նրա տեղաշարժը, հաղորդակցությունը: Ի դեպ, նշենք, որ այդ գործով տնային կալանքի տակ է նաեւ Էկոնոմիկայի նախկին նախարար Վահան Քերոբյանը։

Ստացվում է, որ ԱՆԻՖ-ում գումարների վատնումը ու ոչ արդյունավետ կառավարումը շարունակվում է` չնայած վերահսկողական ծառայության բացահայտումներին:

Հեղինակ՝ Իզաբել Սահակյան

Աղբյուր` Փաստինֆո