Փաստ ինֆո

Երևանի ընդհանուր իրավասության քրեական դատարանում՝ դատավոր Արտուշ Գաբրիելյանի նախագահությամբ, այսօր շարունակվել են Պեմզաշենում 31-ամյա Զարինեի և նրա երկու երեխայի առանձին դաժանությամբ սպանության գործով դատալսումները։

«Փաստինֆո»-ի թղթակցի հաղորդմամբ՝ դատարանում քննարկվել է հետազոտման ենթակա ապացույցների ծավալի և թույլատրելիության հարցը։ Հանրային մեղադրողը նշել է, որ միայն ապացույցների հետազոտումից հետո կարող է քննարկվել փորձագետներին հարցաքննելու հարցը, գրավոր ապացույցները հետազոտելուց հետո գուցե որևէ հարց չառաջանա փորձագետի եզրակացության հետ կապված, մինչդեռ, այս տրամաբանությամբ՝ մի քանի փուլ առաջ են ընկնում, որոշել են, թե արդեն հետազոտել են ապացույցները և անհրաժեշտ է հարցաքննել փորձագետներին․ «Առաջ ընկնելով՝ ծանուցեցինք մի քանի փորձագետի, որոնց հարցաքննությունն արդեն իսկ դատական պրակտիկայով տեսել ենք, թե ինչքան երկար է տևում։ Ըստ իս՝ նրանց հարցաքննության անհրաժեշտություն չկա»։

Բացի այդ, հանրային մեղադրողի դիտարկմամբ՝ դատարանը թույլատրել է մեղադրյալների անձնական բնութագրերը, մինչդեռ, դրանք ապացույց չեն, այդ փաստաթուղթը կարող են հետազոտել՝ լրացուցիչ դատալսումների ժամանակ։ Հաջորդիվ, Արկադի Բարսեղյանի պաշտպան Լյուդվիգյանը միջնորդեց՝ ապացույցների անթույլատրելիության վերաբերյալ։ Մասնավորապես, պաշտպանը վիճարկեց դատահետքաբանական, դատամանրաթելային, դատագենետիկական, դատաբջջաբանական, դատաբժշկական փորձաքննությունների՝ դատաբջջաբանական և դատագենետիկական մասը։

Մինչ միջնորդության բուն էությանն անցնելը՝ պաշտպանը սկսեց ներկայացնել փաստացի դեռ չհետազոտված ապացույցը, ինչով պայմանավորված հանրային մեղադրողը և տուժող կողմն առարկեցին։

Գարիկ Գալիկյանը հայտարարեց, որ դա ապացույցների ծավալում ընդգրկված փաստաթուղթ է, որը դեռևս չի հետազոտվել, սակայն ընթերցվում է, դա մանրուք չէ։ Փաստաբանը հույս հայտնեց, որ գոնե պրոֆեսիոնալ մակարդակում գործով քննություն կիրականացվի, ինչպես նաև՝ հորդորեց կողմի համար կրկին ընթերցել քրդատ նորմերը, եթե կա դրա անհրաժեշտությունը։ Մեղադրյալի պաշտպանը շարունակեց ներկայացնել միջնորդությունը՝ նշելով, որ այդ փորձաքննությունն իրականացվել է իրավասություն չունեցող անձի կողմից, այն պետք է անթույլատրելի ճանաչվի։ Արկադի Բարսեղյանի մյուս պաշտպանը միացավ միջնորդությունը, իսկ Վրույր Բարսեղյանի պաշտպան Էդուարդ Աղաջանյանը դիրքորոշում հայտնեց առ այն, որ ներկայացված միջնորդության լուծումը պետք է հետաձգվի՝ մինչև ապացույցների հետազոտումը։ Ամբաստանյալ Արկադի Բարսեղյանը միացավ իր պաշտպանի միջնորդությանը՝ նշելով, թե․ «Սաղ էլ պետք է մանրամասն հետազոտվի, մաքուր ամեն ինչ բացահայտվի։ Խնդրում եմ՝ ոչինչ բաց չթողնել, մանրամասն հետազոտել՝ մինչև չբացահայտվի»։

Թե՛ դատախազը, թե՛ տուժող կողմն առարկեցին միջնորդության դեմ։ Գարիկ Գալիկյանը հայտարարեց՝ ինչպես են վիճարկում ապացույցի թույլատրելիությունը, եթե չի հետազոտվել այդ ապացույցը։ Դատարանը հետաձգեց միջնորդության լուծումը՝ մինչև ապացույցների հետազոտումը։ Արկադի Բարսեղյանի պաշտպանը ցանկացավ միջնորդել՝ լրացուցիչ ապացույց ձեռք բերել, սակայն նախագահողը նկատեց, որ դատարանն արդեն իսկ սահմանել է ապացույցների ծավալը, հիմնական դատալսումների ավարտական փուլում պաշտպանության կողմը կարող է ներկայացնել միջնորդություն՝ ապացույցների ծավալը լրացնելու վերաբերյալ, հետևաբար, այդ միջնորդությունը այս փուլում քննության առարկա չի դարձվում։

Հիշեցնենք, որ 2022թ. նոյեմբերի 9-ին Շիրակի մարզի Պեմզաշեն գյուղում ողբերգական դեպք է տեղի ունեցել։ Գյուղի տներից մեկում հայտնաբերվել է երեք դի։ Մահացածներն են՝ մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։ Իրավապահ մարմինները հայտնել էին, որ տան ննջասենյակի մեկտեղանի մահճակալին հայտնաբերվել է արական սեռի երեխայի դի՝ կրծքավանդակի հատվածում կտրած-ծակած վերքերով՝ ձեռքերը և ոտքերը կապած վիճակում, նույն ննջասենյակի հատակին հայտնաբերվել է իգական սեռի երեխայի դի՝ կրծքավանդակի հետին մակերեսին և որովայնի հատվածներում կտրած-ծակած վերքերով, իգական սեռի դի՝ որովայնի և կրծքավանդակի հատվածներում ու կրծքավանդակի հետին մակերեսին կտրած-ծակած վերքերով՝ ձեռքերը հետնամասում թելով կապված վիճակում: Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաև հանցանքը ենթադրաբար կատարած երկրորդ անձը՝ 41-ամյա տղամարդ։

Տղամարդիկ ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։ ՔԿ տարածած հաղորդագրության համաձայն՝ մեղադրյալները տուն մուտք են գործել՝ գումար հափշտակելու համար, սակայն, տանտիրուհուց իմանալով, որ տանը գումար չկա, իրենց կողմից կատարված հանցագործությունները թաքցնելու նպատակով, նախ կապել և միմյանց գործողությունները փոխլրացնելով՝ առանձին դաժանությամբ սպանել են կնոջը, ապա 32-ամյա տղամարդը, կատարված հանցանքները թաքցնելու նպատակով, ապօրինաբար կյանքից զրկելու դիտավորությամբ, կապել է երեխաների ձեռքերն ու ոտքերը և խոհանոցային դանակով հարվածներ է հասցրել նրանց մարմնի տարբեր մասերին՝ պատճառելով կյանքի հետ անհամատեղելի մարմնական վնասվածքներ:

Տղամարդկանցից մեկին՝ 32-ամյա Վրույր Բարսեղյանին, մեղադրանք է ներկայացվել ՀՀ քրեական օրենսգրքի 155-րդ հոդվածի 2-րդ մասի 6-րդ, 8-րդ և 13-րդ կետերով, 155-րդ հոդվածի 2-րդ մասի 3-րդ , 5-րդ, 6-րդ և 13-րդ կետերով (երկու դրվագ)՝ այլ հանցանքը թաքցնելու նպատակով մի խումբ անձանց կողմից առանձին դաժանությամբ սպանության և անօգնական վիճակում գտնվող երկու անչափահասին առանձին դաժանությամբ սպանության համար, 252-րդ հոդվածի 3-րդ մասի 2-րդ կետով՝ բնակարան ապօրինի մուտք գործելով ավազակության համար և 198-րդ հոդվածի 4-րդ մասով՝ 12 տարին չլրացած անձի նկատմամբ սեռական բնույթի բռնի գործողություն կատարելու համար։ Մյուս մեղադրյալին՝ 41-ամյա Արկադի Բարսեղյանին, որը, ըստ մամուլի, Նիկոլ Փաշինյանի աջակիցն է, մեղադրանք է ներկայացվել՝ այլ հանցանքը թաքցնելու նպատակով մի խումբ անձանց կողմից սպանություն կատարելու և բնակարան ապօրինի մուտք գործելով ավազակության համար։ Երկուսն էլ կալանավորված են։

Հեղինակ՝ Իզաբել Սահակյան

Աղբյուր` Փաստինֆո