Փաստ ինֆո

Լրագրողների հետ զրույցում Անվտանգության խորհրդի քարտուղար Արմեն Գրիգորյանը չի հերքել ,որ ոչ հրապարակային բանակցում է Ադրբեջանի նախագահի օգնական Հիքմեթ Հաջևի հետ։

Անդրադառնալով հարցին, թե հնարավո՞ր է, որ այդ բանակցություններում քննարկվում են սահմանազատման քարտեզները, նա բացատրել է, թե ինչու են այդ քարտեզները հայկական կողմի համար առաջնահերթություն։

«Մեր համար այդ քարտեզները առաջնահերթություն են, քանի որ Պրահայում դեռևս 2022 թ-ի հոկտեմբերի 6-ին ՀՀ վարչապետը և Ադրբեջանի նախագահը պայմանավորվել են, որ Ալմա Աթայի հռչակագրի հիման վրա ճանաչում են միմյանց տարածքային ամբողջականությունը»։

Նա ընդգծեց, որ ըստ Ալմա Աթայի հռչակագրի՝ Խորհրդային Միության փլուզման պահին եղած ադմինիստրատիվ սահմանը դառնում է պետական սահման։ «Սա նշանակում է, որ Հայաստանի և Ադրբեջանի միջև գոյություն ունեցել է սահման, և այժմ մենք խնդիր ունենք Խորհրդային Միության վերջին տարիների պաշտոնական մարմինների կողմից հրատարակված քարտեզների միջոցով գնալ ու այդ սահմանը վերարտադրել։ Մենք համոզված ենք, որ սա ամբողջովին լեգիտիմ մոտեցում է ու չի խախտում որևէ սկզբունք, ամբողջովին տեղավորվում է Հայաստան-Ադրբեջան հարաբերության կարգավորման համատեքստում։

Կարծում եմ, որ ի վերջո մենք սրա շուրջ համաձայնության ենք գալու, որովհետև Հայաստանի և Ադրբեջանի միջև այլ քարտեզներ գոյություն չուներ։ Մենք շարունակում ենք պնդել, որ պետք է հրապարակվեն Խորհրդային Միության պաշտոնական մարմինների կողմից հրապարակված իրավական փաստաթղթերի հիման վրա սահմանի վերատադրությունը»։

Անդրադառնալով Ռուսաստանի փոխարտգործնախարար Միխայիլ Գալուզինի հայտարարությանը, թե Երևանի աշխարհքաղաքական տատանումները կարող են հանգեցնել ինքնուրույնության կորստի՝ Գրիգորյանն ասաց, որ Հայաստանը տատանումների մեջ չէ, այլ դիվերսիֆիկացնում է իր արտաքին քաղաքականությունը։ «Հայաստանի դիվերսիֆիկացիան ներառում է, ոչ միայն Արևմուտքը, այլև Հնդկաստանը և մի շարք այլ երկրներ։ Հայաստանը՝ տեսնելով, որ մինչև 2020-21 թթ այն անվտանգային համակարգը, որի մաս է կազմում Հայաստանը, որը չի աշխատում, իր համար անվտանգության երաշիքներ է փնտրում։ Շարունակելու ենք այս ուղղությամբ աշխատելը»։

Աղբյուր` Փաստինֆո