Փաստ ինֆո

Վերջերս ակտիվ խոսվում է զորամասերից Փառքի անկյունների վերացման մասին, գրավոր հարցում եմ արել ՊՆ նախարարին: Այս մասին այսօր ԱԺ պաշտպանության և անվտանգության հարցերի հանձնաժողովի նիստում ասաց «Հայաստան» խմբակցության պատգամավոր Գեղամ Մանուկյանը՝ դիմելով ՊՆ փոխնախարար Կարեն Բրուտյանին։

«ՊՆ պաշտոնական կայքից անհետացել է «Արցախյան ազատամարտ» բաժինը, ի վերջո՝ ՀՀ ՊՆ-ն ձևավորվել է արցախյան ազատամարտի հիման վրա: Եթե Անդրանիկ Քոչարյանն ասում է՝ ՊՆ փոխնախարար է եղել ու բանակի հետ կապ է ունեցել՝ արցախյան ազատամարտի հիման վրա է, եթե Մելքոնյան Գագիկը գեներալ է՝ դա էլ արցախյան ազատամարտի հիման վրա է: ՊՆ փոխնախարարը պատճառաբանում էր տեխնիկական խնդիրներով, բայց 2,5 տարվա ընթացքում հնարավոր չէ՞ր վերացնել տեխնիկական խնդիրները ու վերականգնել այդ բաժինը»:
Բրուտյանը պատասխանեց, որ տեղյակ չէ խնդրից, քանի որ դա իր պաշտոնական լիազորություններից դուրս է:

Գեղամ Մանուկյանն էլ շարունակեց, թե 2023-ի փետրվարի 2-ին ՊՆ-ն ԶՈՒ-ում բարեփոխումների շրջանակներում հայտարարել էր բոլոր տեսակի համազգեստների դիզայնի ու տեսքի փոփոխություն։ Այնուհետև ցոըցադրեց լուսանկարներ և ասաց.
«Վստահեցնում էիք, որ 2024-ին Հայկական բանակը աշխարհին կներկայանա նոր համազգեստով ու հանդերձանքով: Սա բարձրագույն սպայական կազմի հանդերձանքն է։ Համազգեստների տարբերությունը նայեք, մարդ գետինն է մտնում: Ե՞րբ վերջապես ՀՀ զինված ուժերը նոր համազգեստ կունենան»։

ՊՆ փոխնախարարը պատասխանեց, որ ձգտում են, որ այդ փոփոխությունները ոչ թե ձևական լինեն, այլ համազգեստին իրոք չնայեն որպես շոր: «Նայենք որպես գործիք, որը ֆունկցիա է իրականացնում: Ուսումնասիրում ենք միջազգային լավագույն փորձը, որի անունը կարող ենք դնել ՆԱՏՕ-ի ստանդարտներ, չնայած այնտեղ էլ այդքան միանշանակ չի: Կախված երկրից, տեղանքից, բնակլիմայական պայմաններից, ՆԱՏՕ-ի ստանդարտները շատ տարբեր են»:

Նա նաև ասաց, որ առաջադեմ բանակ ունեցող երկրների փորձը հիմա փորձում են տեղայնացնել։ «Ես կխնդրեի, որ ձեր սպասումները ոչ թե լինեն հիմա արագ անելու շուրջ, այլ լավ որակի ապրանք՝ հագուստ ունենալու շուրջ: Եթե դրա համար պետք է մի քանի տարի, այո, կլինի մի քանի տարի»։

Աղբյուր` Փաստինֆո