Փաստ ինֆո

36 տարի առաջ մեր ճակատագիրը որոշող որոշում կայացրեցինք, 36 տարի շարունակ մեր քաջորդիները գիտակցաբար գնացին հանուն այդ որոշման: Այս մասին այսօր՝ փետրվարի 20-ին, ՀՀ-ում Արցախի ներկայացուցչության դիմաց լրագրողներ հետ զրույցում ասաց Արցախի Ազգային ժողովի պատգամավոր Մետաքսե Հակոբյանը:

«Մեր միասնականությունը, որը տեղի ունեցավ ի ցուցադրություն աշխարհի, որեւէ մեկը չկարողացավ կանգնեցնել: Հիմա՝ 36 տարի անց արձանագրում ենք, որ Արցախը հայաթափվել է: Մենք առավել քան կարիքն ունենք միասնական լինելու եւ մեր օրակարգում այլ խնդիր պետք է չունենանք: Ես տեսնում եմ, որ մեր հանրությունը պատրաստ է լինել միասնական, պատրաստ է պայքարել իր ինքնության, հայկականության, ուղղակի պետք է դա ճիշտ կազմակերպել եւ այդ միասնականությունն իր արդյունքը կտա»,- նշել է արցախցի պատգամավորը։

Մետաքսե Հակոբյանի խոսքով օրվա խորհրդի հետ կապված միջոցառումներ կլինեն, որը տեղի է ունենալու նաեւ Արցախի ներկայացուցչությունում. «Այստեղ են նաեւ Արցախի ԱԺ նախկին գումարումների պատգամավորներ, մարդիկ, որոնք ակունքներում են եղել 1988-ի փետրվարի 20-ի որոշման»:

Այսօր լրանում է Արցախյան շարժման 36-ամյակը: Վաղ առավոտյան Արցախի նախագահն այլ գործիչների հետ այցելել է Եռաբլուր, իսկ Երեւանում գտնվող Արցախի ներկայացուցչությունում այս պահին նիստ է ընթանում։

Աղբյուր` Փաստինֆո