Փաստ ինֆո

Ճշգրիտ որևէ մեկը չի կարող հաշվարկներ ներկայացնել, թե եկամտային հարկի վերադարձով բնակարանների ձեռքբերման ծրագրի դադարեցումը ինչպես կազդի Հայաստանում շինարարության ոլորտի, անշարժ գույքի գների, ինչպես նաև, առհասարակ, ողջ տնտեսության վրա։

Չնայած դրան, ՔՊ-ական պատգամավոր Բաբկեն Թունյանը վստահ է, որ Երևանում անշարժ գույքի շուկայի զարգացումները միայն եկամտահարկի հետ վերադարձի օրենքով չեն պայմանավորված։

«Փաստինֆոյի» հետ զրույցում նա կարծիք հայտնեց, որ դրանք պայմանավորված են երկրի ներսում տնտեսության աճով, մարդկանց գնողունակության ավելացմամբ կամ միգրանտների ներհոսքով։ «Այդ ամենը հաշվի առնելով՝ մի օր կարող է անշարժ գույքի պահանջարկը էապես ավելանալ կամ նվազել։ Բայց ընդհանուր մեր գնահատականն այն է եղել, որ շինարարական բումը Երևանից տեղափոխվի ուրիշ մարզեր։ Կարծում եմ, արդեն պրոցեսը սկսվել է, ուղղակի մինչև ծրագրի ավարտը շատերը փորձել են արագ Երևանում շինթույլտվություններ ստանալ և կառուցապատումներ սկսել, բայց հետո կակտիվանա շինարարությունը նախ մոտիկ մարզերում, հետո նաև հեռավոր մարզերում»,- պնդում է Թունյանը։

Դիտարկմանը, թե վերջին եռամսյակում արդեն 20-25 տոկոս նվազել է աշխարժ գույքի գործարքների քանակը՝ նա հակադարձեց, որ ծրագիրը այս տարվա վերջ է դուրս գալու։ «Շատերը ծրագրում էին 2-3 տարուց այդ գործարքները կատարել, բայց հիմա նրանք առաջ են բերել այդ գործարքները։ Դրա համար էլ անցած ու դրա նախորդ տարի մեծ աճ ենք ունեցել»,- պարզաբանում է քպական պատգամավորը։

Կառուցապատողների ասոցիացիայի նախագահ Գուրգեն Գրիգորյանն այսօր հայտարարել է, որ ինքը նույնպես կդժվարանա ասել, թե եկամտահարկի վերադարձի դադարեցումը ինչպես կազդի ոլորտի ու ողջ տնտեսության վրա։

«Կառուցապատումը ռազմավարական ու անվտանգային կարևոր ճյուղ է տնտեսության, երկրի հարկաբյուջետային համակարգում։ Բնականաբար, եթե շինարարության տեմպերը նվազեն դոմինոյի էֆեկտով դա սկսելու է ազդեցություն ունենալ նաև տնտեսության մյուս ճյուղերի վրա։ Սա ենթադրում է, որ այն ծավալներով հարկային մուտքերը, որ կան այժմ՝ չեն լինելու, ՀՆԱ-ում այն տեսակարար կշիռը որ հիմա կա՝ ևս չի լինելու։ Ինչ վերաբերում է շուկայի վրա ազդեցությանը՝ նոր կառուցվող բնակարանային ֆոնդ այլևս չի լինելու»։

Նրա դիտարկմամբ՝ հիմնավոր չէ այն դիտարկումը, թե ծրագիրը տեղափոխվելու է մարզեր։ «Երբ դեռ եկամտային հարկի հետ վերադարձի կարգավորումները փոփոխվում էին, մենք կառավարության այդ հիմնավորմանը պատասխանել ենք, որ երբ ծրագիրը Երևանում դադարի՝ դրանից հետո փաստացի տեղի է ունենալու Երևանի սահմանների ընդլայնում, որովհետև կառուցապատման ծարագրերը իրականացվելու են հենց մերձերևանային հատվածներում։ Որևէ կառուցապատող չի գնալու և հեռավոր մարզերում կառուցապատման ծրագիր իրականացնի։ Մեր կանխատեսումները հիմա արդեն իրականություն են դառնում։ Կյանքը ցույց տվեց, որ բացառապես մերձերևանային հատվածներում է կառուցապատում իրականանում ինչը նշանակում է Երևանի փաստացի սահմանների ընդլայնում»։

Նրա դիտարկմամբ՝ այս պահին բնակարանների պահանջարկ կա, որովհետև դեռ կա այդ ծրագիրը, եթե չլինի՝ պահանջարկի էական անկում կարձանագրվի։

«Չեմ ասում ՝ կդադարի, որովհետև կլինեն կառուցապատողներ և գնողունակ սուբյեկտներ, սակայն սոցիալական բնակարանաշինությունը, որը ենթադրում էր մատչելի բնակարանաշինություն, որպեսզի աշխատավարձով ապրող քաղաքացին կարողանա տուն ձեռք բերել՝ այլևս չի կարողանա տուն ձեռք բերել»։

Նա նաև հայտնեց, որ իրենք առաջարկներ են ներկայացրել կառավարությանը, որոնք վերաբերում են ռենովացման կամ հիպոփեքային տոկոսների նվազեցման ծրագրեր, որոնց նպատակն այն էր, որ երբ եկամտային հարկի հետ վերադարձի ծրագիրը դադարի՝ մարդիկ հնարավորություն ունենան այդ բեռի տակ մտնել ու հիպոթեքային վարկ սպասարկել։ Առաջարկներին որևէ արձագանք չի եղել։

Աղբյուր` Փաստինֆո