Փաստ ինֆո

1988 թ. ազգը միասնական էր՝ Արցախ, Հայաստան, Սփյուռք։ Որպեսզի միշտ տաք պահենք Արցախի թեման, մենք պետք է ունենանք հզոր Հայաստան և հզոր Սփյուռք, այսօր այդ եռամիասնությունը շատ կարևոր է: Երեւանում Արցախի ներկայացուցչության մոտ լրագրողների հետ ճեպազրույցում ասաց Արցախի Հանրապետության ԱԺ նախկին նախագահ Արթուր Թովմասյանը։

Նրա խոսքերով կան հարցեր, որոնք քաղաքական չեն, ունենք վերադարձի իրավունք, մշակութային ժառանգության պահպանման իրավունք, կորցրած գույքի իրավունք եւ դրանք պետք է բարձրաձայնել: Ո՞վ պետք է բարձրաձայնի:

«Ես մի առիթով ասել եմ, որ մենք չենք կարող լուծարել Արցախի ԱԺ-ն, չենք կարող ինքնալուծարվել, ոչ ոք Արցախը լուծարելու իրավունք չունի, մինչև 2025 թվականի մայիսի 21-ը Արցախի ԱԺ-ն գործելու է։ Թեկուզ օրենքներ չենք ընդունելու, բայց որոշումներ, հայտարարություններ լինելու են։
Մենք ունենք երկու ճանապարհ․ մեկը ուռա-հայրենասիրության ճանապարհն է, մյուսը՝ ներկա իրողությունները հաշվի առնելը։ Ես գտնում եմ, որ ներկա իրողություններով պետք է առաջնորդվենք, որպեսզի վնաս չհասցնենք

Հայաստանի և Արցախի մեր հայրենակիցներին»,- հայտարարել է Թովմասյանը։

Անդրադառնալով գերիների հարցին, որոնց թվում է նաեւ Արցախի ռազմաքաղաքական ղեկավարությունը՝ Արցախի ԱԺ նախկին նախագահն ասել է, որ ՀՀ իշխանություններն իրենց ասում են, որ իրենք զբաղվում են գերիների հարցով, ոչ միայն Արցախի ռազմաքաղաքական ղեկավարներով, այլեւ բոլոր գերիներով, որոնք Բաքվի բանտերում են. «Ես ուսումնասիրել եմ Ադրբեջանի քրեական օրենսգիրքը, քաղաքացիական օրենսգիրքը: Շատ դաժան հոդվածներ են, նրանց կոչում են ահաբեկիչներ, անջատողականներ, բայց այս 30 տարիներին ԵԱՀԿ համանախագահող երկրները միշտ էլ եղել են Ստեփանակերտում: Արդյոք նրանք այցելել են ահաբեկիչների, անջատողականների: Արցախի բոլոր ընտրություններին միշտ էլ միջազգային դիտորդներ են եղել, 100-ից ավելի պետություններից: Բոլորն էլ արձանագրել են, որ ընտրությունները տեղի են ունեցել ժողովրդավարության սկզբունքներին եւ Արցախի ընտրական օրենսգրքի համապատասխան եւ մի քայլ առաջ է, քան նախորդ տարիներին: Արձանագրել են, որ մենք ընտրություններն ավելի լավ ենք կազմակերպում, քան տարածաշրջանի պետությունները»:

Դառնալով արցախահայության Արցախ հնարավոր վերադարձի հարցին՝ Արթուր Թովմասյանը հայտարարել է, որ դրա համար միջազգային երաշխիքներ են պետք, քանի որ անվտանգության հարցեր կան. «Արցախցիները չեն կարող վերադառնալ որպես Ադրբեջանի քաղաքացիներ, դա անհնար է»։

Աղբյուր` Փաստինֆո