Փաստ ինֆո

Հակակոռուպցիոն դատարանում՝ դատավոր Տիգրան Դավթյանի նախագահությամբ, այսօր կայացել է ՊԵԿ նախկին նախագահ Գագիկ Խաչատրյանի որդու՝ Արտյոմ Խաչատրյանի, եղբորորդու՝ Արամ Սուրենի Խաչատրյանի, «Մուլտի Գրուպ Կոնցեռն» ՍՊԸ տնօրեն Սեդրակ Առուստամյանի, բանկերից մեկի վարորդ Աշոտ Պապիկյանի վերաբերյալ քրեական գործով դատական նիստը։

Հիշեցնենք, որ գործը վերաբերում է փողերի լվացմանը, պաշտոնեական լիազրությունների չարաշահմամբ առանձնապես խոշոր չափերի գույքի յուրացմանն օժանդակելուն։

«Փաստինֆո»-ի թղթակցի հաղորդմամբ՝ դատարանում Արտյոմ Խաչատրյանի պաշտպան Երեմ Սարգսյանը միջնորդել էր հետաձգել դատալսումները և պարտավորեցնել դատախազին՝ մեղադրական եզրակացությունը Քրեական դատավարության օրենսգրքի պահանջներին։ Պաշտպանության կողմի դիտարկմամբ՝ մեղադրական եզրակացությունում չի արձանագրվել հօգուտ մեղադրյալների փաստերը։ Բացի այդ՝ խնդրահարույց է նաև քրեական վարույթ նախաձեռնելու հիմքերի և առարկայի մասով։ Դատախազն առարկեց միջնորդության դեմ՝ նշելով, որ մեղադրանքը չընդունելը չի կարող մեկնաբանվել հօգուտ նրա, հատկապես, եթե նա հրաժարվել է ցուցմունք տալուց։ Ըստ նրա՝ դիրքորոշում հայտնելը չի կարող հօգուտ մեղադրյալի փաստարկ համարվել։ Բացի այդ՝ դատախազը մտահոգություն հայտնեց առ այն, թե արդյոք հարցի քննարկումը չի վերածվի քրեական գործ հարուցելու իրավաչափության հարցի քննարկման, ինչն անթույլատրելի է։
Դատախազ Արմեն Գևորգյանի խոսքով՝ մեղադրական եզրակացությամբ նշվում է, թե որն է եղել գործի հարուցման առիթը, մասնավորապես՝ հետաքննական մարմնի կողմից տեղեկությունների հայտնաբերումը և նախապատրաստված նյութերը։ Նա պնդեց, թե մեղադրական եզրակացությունը համապատասխանում է քրդատի պահանջներին։

Դատարանը որոշեց հետաձգել միջնորդության լուծումը՝ նշելով, որ դա այս փուլում քննարկման առարկա չէ, այն վերաբերում է վարույթի օրինականությանը։ Ըստ նրա՝ առնվազն այն, որ մեղադրական եզրակացությունում գործի հարուցման հիմքերի և առիթի նշումը ենթադրում է, որ եզրակազությունը համապատասխանում է քրդատ օրենսգրքի պահանջներին։

Երեմ Սարգսյանն առարկեց դատարանի գործողությունների դեմ՝ նշելով, որ դատաքննությունն անարդար է տեղի ունենում՝ ի սկզբանե։
Հաջորդիվ քննարկման առարկա դարձվեց դատարանի ինքնաբացարկի հարցը։ Պաշտպան Սարգսյանը, թեև արձանագրեց, որ նախորդ որոշման հրապարակումից հետ կասկածներ ունի դատարանի անաչառության վերաբերյալ, բայց բացարկ չի հայտնի։ Նման միջնորդություն չներկայացրին նաև դատավարության մյուս մասնակիցները։

Պաշտպան Երեմ Սարգսյանը բացարկի միջնորդություն ներկայացրեց հանրային մեղադրող Արմեն Գևորգյանին՝ կասկածի տակ դնելով անկողմնակալությունը։ Փաստաբանը հիշեցրեց, որ դատախազը չի վերացրել խախտումները, ավելին, նախաքննության ավարտից հետո 57 հատոր նյութերին ծանոթանալոգ համար տրվել էր 10 օր ժամանակ։ Դատարանը, թեև արձանագրեց, որ 57 հատորին ծանոթանալու համար իրապես 10 օր ժամանակը քիչ է, բայց դա չի վկայում, որ դատախազը կողմնակալ է, ուստի՝ մերժեց միջնորդությունը։

Հեղինակ՝ Իզաբել Սահակյան

Աղբյուր` Փաստինֆո