Փաստ ինֆո

ՀՀ ԱՆ «Դատաբժշկական Գիտագործնական Կենտրոն» ՊՈԱԿ–ի տնօրեն Մհեր Բիշարյանի նկատմամբ դեռևս որևէ խափանման միջոց չի կիրառվել, նա շարունակում է գտնվել ազատության մեջ։ Այս մասին «Փաստինֆո»-ի հետ զրույցում հայտնեց փաստաբան Էմին Խաչատրյանը։

Հիշեցնենք, որ Մհեր Բիշարյանի ձերբակալության մասին հայտնի էր դարձել փետրվարի 17-ին։ Բիշարյանին մեղադրանք է ներկայացվել 44-օրյա պատերազմից հետո ԴՆԹ փորձաքննությունների համար նախատեսված սարքավորումների ձեռքբերման նպատակով կնքված գործարքների վերաբերյալ քրեական վարույթի շրջանակներում։ ՀԿԿ քննիչը միջնորդություն էր ներկայացրել Բիշարյանին կալանավորելու վերաբերյալ, որը դատարանի կողմից մերժվել է։

Քրեական վարույթի շրջանակներում այս պահին այլ մեղադրյալներ, ըստ փաստաբան Էմին Խաչատրյանի տեղեկությունների, չկան։ Փաստաբան Էմին Խաչատրյանը, նախաքննության գաղտնիությամբ պայմանավորված զերծ մնաց մանրամասներ հայտնելուց, միայն նշեց, որ առկա չէ որևէ տվյալ, որը կհաստատի մեղադրանքը, որը փաստաբանի գնահատմամբ՝ ակնհայտ անհիմն է։

«Անհրաժեշտություն է եղել գնելու սարքավորում, ընդ որում՝ հնարավորինս ամենասեղմ ժամկետներում և այն եզրույթը, որ գրված է մեղադրանքի որոշման մեջ, թե, իբր, պարոն Բիշարյանը գործել է պետական շահերին հակառակ՝ զավեշտ է, որովհետև չեմ կարծում, որ որևէ ֆինանսական արժեքով կարելի է համեմատել մեր զոհված եղբայրների աճյունները՝ մեկ վայրկյան շուտ նույնականացնելը և ծնողներին տրամադրելը»,- նշեց Խաչատրյանը՝ մանրամասնելով․ «Ռազմական դրության պայմաններում, երբ համատարած քովիդ էր, վեջին կետը հենց պարոն Բիշարյանի մոտ է եղել, որտեղից էլ ծնողները պահանջել են իրենց տղաների աճյունները կամ մասունքները, անհրաժեշտություն է եղել գնելու այդ սարքավորումը՝ հնարավորինս շուտ, հետևաբար, այդ սարքավորումը գնվել է։ Վարույթն իրականացնող մարմինը, ինչ-ինչ պատճառներով, պնդում էր, թե հնարավոր էր 10 մլն դրամով ավելի էժան գնել, բայց այդ դեպքում այդ սարքավորումը կարող էր մոտ 1,5-2 ամիս ուշ հասներ ՀՀ, իսկ այդ 1,5 ամսվա ընթացքում քանի ծնողի է հանձնվել իր զավակի մասունքները։ Չեմ կարծում, որ 10 մլն դրամն այդ էական վնասն է կամ առհասարակ վնաս գոյություն ունի»։

Փաստաբանի խոսքով՝ մրցույթ չպետք է հայտարարվեր, պետք էր հրատապ գնում կատարել, գնառաջարկներ են եղել, համապատասխան աշխատակիցները կապ են հաստատել կազմակերպության հետ և այնտեղից արդեն նշել են, թե որ կազմակերպություններն են ներկայացուցիչները համապատասխան տարածաշրջանում։ Իսկ թե սարքն ինչ ճշգրտությամբ է աշխատում սարքը, արդյո՞ք փորձաքննություններից հետո կրկնակի փորձաքննությամբ այլ արդյունքներ են արձանագրվել, Խաչատրյանը նշեց, որ սարքն արդիական է, ճշգրտության առումով ինքը չի լսել որևէ խնդիր, այդ ժամանակահատվածում սարքի առկայության պայմաններում սարքով օրական հնարավոր է եղել մինչև 15 նույնականացում իրականացնել։

«Սարքն ունի հիշողություն, կարող են այդպես նայել, թե քանի նույնականացում է արվել։ Եթե սարքը 2 ամիս ավելի ուշ լիներ, ապա այդ կտրվածքով նայելու դեպքում, որ օրական 10-15 նույնականացում է իրականացվել, ապա քանի ծնողի էր ուշ հանձնվելու երեխայի մասնունքները»,- նշեց փաստաբանը՝ հավելելով, որ, որքանով իրեն է հայտնի՝ 2021թ հունվարի 15-ից արդեն առաջին նույնականացումները սկսել են։ Սարքը ՀՀ է հասել 2021թ․ հունվարի 6-ին, գնման գործարքը տեղի է ունեցել 2020թ․ դեկտեմբեր ամսին։

Ավելին, նրա փոխանցմամբ՝ Բիշարյանը միանձնյա չի որոշել, միայնակ գնում չի կատարել, սահմանված տարաբնույթ գրագրություն է եղել, ի վերջո՝ ֆինանսները կառավարությունն է փոխանցել։

«Այդուհանդերձ, ես իմ անհամաձայնությունն եմ հայտնում վարույթն իրականացնող մարմնի գործողությունների դեմ։ Գիտեք՝ այսօրվա պայմաններում՝ 2023-24թթ, համեմատաբար հանգիստ պայմաններում նստել և քննարկելը, թե մեկ ժամ շուտ կամ ուշ ինչ-որ թուղթ է եկել կամ ինչ-որ բան է եղել, այդքան էլ արդար չէ, որովհետև եթե նույնիսկ մտովի վերադառնանք 2020թ նոյեմբեր-դեկտեմբեր ամիսներ, ապա որևէ մեկի մոտ նման հիշողության կորուստ չկա, որ չհիշենք այդ ժամանակ իրավիճակը, ամենաքննարկվող թեման, ամենաշատն այցելվող վայրերը՝ Եռաբլուր, գերեզմանատներ, ծնողները պարբերաբար Հերացի փողոցի վրա այդ հիմնարկի դիմաց էին՝ պահանջելով իրենց որդիների աճյունները, մարդկանց հոգեկան վիճակը շատ ծանր էր, ինձ թվում է պարզ է՝ արդյոք այդ սարքն անհրաժեշտ չէր օր առաջ գնել»,- նշեց փաստաբանը։

Նշենք, որ քրեական վարույթը նախաձեռնվել է մամուլի հրապարակման հիման վրա։

Հեղինակ՝ Իզաբել Սահակյան

Աղբյուր` Փաստինֆո