Փաստ ինֆո

Մյունխենում ՀՀ վարչապետ Նիկոլ Փաշինյանի հետ հանդիպմանը գերմանահայկական լուրջ կառույցներ չեն մասնակցել, ինքս Գերմանահայոց կենտրոնական խորհրդի վարչության անդամ եմ, բայց ե հարց եմ հղել իմ անունից` որպես համայնքի անդամ, ոչ թե որպես կառույցի անդամ։ Այս մասին «Փաստինֆո»-ի հետ զրույցում ասաց Մյունխենում Փաշինյանի հրաժարականի ու առհասարակ քաղաքականությունից հեռանալու կոչ հնչեցրած Սամվել Լուլուկյանը։

Նա ընդգծեց, որ հանդիպմանը չէին մասնացում կարևորագույն կառույցներ, ինչպես, օրինակ կենտրոնական խորհուրդն էր, չի մասնակցել առաջնորդարանը, նաև սրբազանը ներկա չէր։

«Այսինքն, լուրջ կառույցների ներկայացուցիչներ չկային։ Ես համայնքի հետ լուրջ կապեր ունեմ, բայց ներկաներից որևէ մեկին չէի ճանաչում։ Ներկա էին ուսանողներ, երիտասարդներ, Փաշինյանի աջակիցներ, ովքեր համայնքի հետ առհասարակ կապ չունեին։

Այնտեղ էր միայն Մյունխեն քաղաքի հայ համայնքի ատենապետը, ով հայտնի է իր նիկոլական հայացքներով։ Ընդ որում՝ անձն, ով հորդորում էր վարչապետին իր ինքնաթիռով Հայաստան տարել՝ «կորսված հայրենիքի համար ողբացողներին», նույնպես նրա մտերիմներից էր։
Լուլուկյանն ասում է՝ Փաշինյանի պատասխանից բավարարված չէ, ավելին, իր համար այս ոճի պատասխանը սպասելի էր։

«Նա ամբողջությամբ մանիպուլյատիվ կերպով էր պատասխանում, մինչդեռ, ես 6 տարվա իր գործունեության ժամանակագրությունն ու փաստերն էի ներկայացնում։Նրա, մեղմ ասած, ձախողումների ժամանակացույցն եմ ներկայացրել, որը բոլորիս աչքի առաջ է տեղի ունեցել։ Սա ակնհայտ է, ինքը ձախողումների մասին իմ հարցին չպատասխանեց, բայց այնտեղ ու հիմա էլ պնդում եմ, որ նա 6 տարի է միայն պատճառաբանություններ ներկայացնելով է զբաղված, մինչդեռ իրեն ոչ թե պատճառաբանությունների, այլ լուծումների, անվտանգություն ապահովելու համար են ընտրել»։

Լուլուկյանի դիտարկմամբ՝ Փաշինյանը նաև փորձում է ներկայացնել, որ ժողովուրդն է իրեն ընտրել, բայց ժողովուրդն իրեն մանդատ չի տվել Արցախը հանձնելու համար, նրան ընտրել էին Արցախի ինքնորոշման իրավունքն իրացնելու համար։ «Նա ժողովրդին մի բան է խոստացել, մեկ այլ բան արել, հետևաբար նա լեգիտիմ վարչապետ չէ»,- ընդգծել է գերմանահայ համայնքի ներկայացուցիչը՝ նկատելով, որ իր բոլոր պատասխաններում Փաշինյանն առաջ է մղում բռնապետական Ադրբեջանի թեզերը, մինչդեռ 30 տարի մենք այդ թեզերին հակադարձել ենք ինքնորոշման իրավունքը, որ միջազգային բոլոր հարթակներում ավելի բաձր էր դասվում, քան տարածքային ամբողջականության սկզբունքը։

«Ամենասարսափելին այն է, որ նա կորսված հայրենքի համար մտածելն անգամ մեծագույն սխալ է համարում, այդ հայրենիքն իր համար ոչինչ է, սխալ է անգամ դրա մասին խոսելը։ Բայց երբ ինքն ասում էր, որ «Արցախը՝ Հայաստան է, և վերջ, այդ ժամանակ Արցախը հայրենիք չէ՞ր, մենք պիտի համակերպվե՞նք, ինքը հայրենասիրությունը կոմպլեքս է հանարում, ասում է, որ պետք է համակերպվենք Արցախի կորստի հետ, սա ինձ համար ամենասարսափելին է»,- նշել է Լուլուկյանը։

Հարցին, թե արդյոք իր տեսակետը կրղներն են գերիշխում Գերմանիայի համայնքում, արդյոք հայերն այնտեղ էլ կարծում են, որ Փաշինյանը պետք է հրաժարական տա, թե մարդիկ գտնում են, որ Փաշինյանը ճիշտ քաղաքական գիծ է որդեգրել՝ նա պատասխանեց, որ իհարկե, կան նաև պրոիշխանական տեսակետներ ունեցողներ, բայց հիմնականում մարդիկ հասկանում են, թե ինչ է տեղի ունենում Հայաստանում։ «Մարդիկ հասկանում են, որ երկիրն աղետալի վիճակում է, որ այսօր արդեն Հայաստանն է զոհասեղանին դրված։ Հենց այդ պատճառով կառույցները, մեծամասամբ, չեն մասնակցում այդ հանդիպմանը, քանի որ չեն վստահում Փաշինյանին»։

Աղբյուր` Փաստինֆո