Փաստ ինֆո

ՀՀ գործող իշխանությունը ոչ միայն ամբողջությամբ տապալել է սեփական ծրագիրը, որով երկրորդ անգամ մանդատ է ստացել, այլև՝ մսխել է այս ամբողջ ժամանակահատվածը։ Ակնհայտ է, թե ում քմահաճույքով է իշխող ուժի պարագլուխը հիմա էլ ուզում Սահմանադրություն փոխել։ Այն ծրագիրը, որին 680 հազար հոգին «այո» են ասել, լրիվ տարբեր է արվող քայլերից․ նրանում Արցախն Ադրբեջանի մաս ճանաչելու, Արցախի անվտանգության երաշխավորի կարգավիճակից հրաժարվելու, Սահմանադրություն փոխելու մասին որևէ ակնարկ չկա։ Այդ մասին «Փաստինֆո»-ի հետ զրույցում ասաց քաղաքագետ, միջազգայնագետ Դավիթ Կարապետյանը։

«Ունենք մանիպուլյատիվ քաղաքականություն վարող վերնախավ՝ ի դեմս Փաշինյանի։ Չնայած նրա վարկանիշը գահավիժում է և այժմ 10 տոկոսից ցածր է նրան վստահողների թիվը, այդուհանդերձ, նրան հեռացնելու հանրային պահանջ չի ձևավորվում, համաժողովրդական ցասումը տեսանելի չէ, ուստի ինչ ուզում՝ անում է։ Ակնհայտ փաստ է, որ նախընտրական ծրագրից որևէ դրույթ չի բավարարվել․ հակառակը՝ Արցախը կորցել ենք, ՀՀ լայնամաշստաբ պատերազմի շեմին է, անվտանգային համակարգը լրիվ խարխլված, իսկ «խաղաղության օրակարգ» գոյություն չունի»,-նկատեց քաղաքագետը։

Փաշինյանի ապազգային կեցվածքի ու ինքնասիրություն չունենալու հարցում, ինչպես Կարապետյանն է նկատում, պարբերաբար ենք համոզվում։ Մյունխենում հայկական համայնքի ներկայացուցիչների հետ հանդիպմանը նրան ուղղված հորդորից՝ կամք դրսևորելու և իշխանությունից հեռանալու մասին, Փաշինյանն անգամ վատ չզգաց՝ ինչպես «թուրք» որակումից չէր վատ զգում։

«Ժողովուրդը համատարած ապատիայի մեջ է․ ամենասարսափելին դա է։ Կա՛մ լիովին չեն գիտակցում, չեն ուզում հավատալ, որ գործ ունենք թուրք-ադրբեջանական տանդեմի հետ, կա՛մ էլ

թերագնահատում են այդ միությունը։ Թերագնահատելու իրավունք չունենք։ Չմոռանանք, որ 2024-25թթ․ նրանք հայտարարել են բեկումնային՝ Հայաստան հետ հաաբերությունների համատեքստում։ Որքան արտաքին աշխարհի համար Ալիևը հայտարարում է, թե պատրաստ է ճանաչելու ՀՀ տարածքային ամբողջականությունը, շատ ավելի հստակ քայլերով ու հայտարարություններով ներքին լսարանին հակառակն է ապացուցում։ Ծավալապաշտական նկրտումները, որ ունի Ադրբեջանը ՀՀ նկատմամբ, նա ամեն պահի դրսևորում է․ հենց հիմա մենք սողացող պատերազմի մեջ ենք․ հեկտար առ հեկտար առաջ են գալիս, նորանոր տարածքներ պոկում ՀՀ-ից ու դա շարունակելու է, եթե համաժողովրդական ընդվզում չլինի ու Փաշինյանը չհեռացվի իշխանությունից»,-շեշտեց Դավիթ Կաարպետյանը։

Աղբյուր` Փաստինֆո