Փաստ ինֆո

Հուսով եմ, որ Մյունխենյան հանդիպումներով կարող ենք ազդարարել հայ-ադրբեջանական բանակցային գործընթացի՝ արևմտյան հարթակում վերականգնելու մասին։ Լրագրողների հետ զրույցում ասել է ՀՀ ԱԺ «ՔՊ» խմբակցության պատգամավոր Գևորգ Պապոյանը։ «Մենք շատ ենք լսում Ալիևից մի բան այդ հարթակներում, ապա վերադառնում են Բաքու և լրիվ ուրիշ բան են ասում։ Սա երևի վերջին 30 տարիներին այդ ձեռագիրը կա։ Հույս ունեմ, որ նախ տեղի կունենա ԱԳ նախարարների հանդիպում, որից հետո բանակցությունները կվերսկսվեն»։

Անդրադառնալով Սահմանադրության փոփոխության շուրջ Ադրբեջանից հնչող հայտարարություններին՝ իշխող խմբակցության պատգամավորը պնդեց, որ ՀՀ սահմանադրության փոփոխությունը մեր ներքին գործն է։

«Սահմանադրությունը փոխելու համար հստակ սուբյեկտներ կան, որոնք կարող են ինչ-ինչ դեպքերում այդ փոփոխությունը անել։ Այդ սուբյեկտներից որևէ մեկն էլ կորոշի՝ անել այդ փոփոխությունները, թե ոչ։ Դա բացարձակապես ՀՀ սահմանադրությունը փոխելու իրավունք ունեցող սուբյեկտների որոշելիքն է, և բացարձակապես սահմանադիրի՝ ժողովրդի որոշելիքն է և դա կապված է ՀՀ ներքին հարցերի կազմակերպման, կարգավորման հետ, և որևէ կերպ չի կարող կապ ունենալ որևէ երկրի պահանջների հետ»,- նշել է Պապոյանը։

Հարցին, թե փոխվելու են այն բոլոր թեզերը, որոնցում, խնդիր է տեսնում Ադրբեջանը՝ նա պատասխանեց, որ փոխելու ենք մենք։ «Եթե ընտրելու իրավունք ունեցող 25 տոկոսից ավելին և այդ զանգվածի քվերակությունը 50+ տոկոսով կլինի կողմ, ապա Հայաստանում տեղի կունենան սահմանադրական փոփոխություններ։ Եթե չի հավաքվի այդքան ձայն, ապա սահմանադրությունը չի փոխվի։ Սա նշանակում է, որ սահմանադրությունը փոխելու է ժողովուրդը, եթե ժողովուրդը դրան կողմ կլինի, բայց դա ինձ կամ ձեզ դուր չի գա, դա արդեն էական չի լինի։ Էականն այն է, որ եթե ժողովուրդը մի բան որոշի, գնա ասի՝ իմ սահմանադրությունը էսպիսի տեսք պետք է ունենա, մնացածս՝ ովքեր այդ պահին կլինենք փոքրամասնություն՝ պետք է հարգենք այդ որոշումը և համարենք, որ դա էդպես է»։

Աղբյուր` Փաստինֆո