Փաստ ինֆո

Սահմանադրության փոփոխության մասին Ալիևը չի ակնարկում, Ալիևը առաջին անգամ 2 տարի առաջ է այդ մասին խոսել ու պահանջել, հետագայում մի քանի անգամ դրա մասին խոսել է։

Այս մասին լրագրողների հետ զրույցում ասաց ՀՀ երրորդ նախագահ Սերժ Սարգսյանը։

«Չեմ կարծում, որ այս պարագայում Հայաստանի կառավարիչների կողմից ժամանակ շահելը այլ նպատակ ունի, քան իրենց իշխանությունը երկարաձգելը։

Եթե այս մարդիկ 3,5 տարվա ընթացքում չեն հասցրել կահավորել մեր առաջնագիծը, ապա այս ժամանակահատվածում ինչ- որ բա՞ն պետք է տեղի ունենա, միգուցե նրանց թվում է, որ ինչ -որ հրաշք պետք է տեղի ունենա, որ Ադրբեջանը իր պահանջներից հետ կանգնի։ Չի կարող նման բան լինել, որովհետև նորից պետք է կրկնեմ, կապիտուլիացիան ուղղակի սպանում է կապիտուլիացվողի կամքը, մենք գործ ունենք արդեն մեկը՝ մյուսով փոխարինելու հետ։ Այն կամքը, որ ցուցաբերվում է ներքին կյանքում, դրանով փորձում են կոմպեսացնել արտաքին դաշտում իրենց կամազրկությունը»,- նշել է երրորդ նախագահը։

Դիտարկմանը, թե ասում եք՝ 3,5 տարում սահման չեն կահավորել, բայց իր իշխանությանն էլ մեղադրում են 20 տարում այդ սահմանը չկահավորելու մեջ՝ Սարգսյանն արձագանքեց. «Միայն դա չէ, նաև ասում են, որ 20 տարի զենք չենք ունեցել, բայց բանից դուրս է գալիս, որ ադրբեջանցիները սպասում էին, որ մենք գնանք, իրենք հարձակվեն ու ցույց տան, որ դիրքերը պատշաճ կահավորված չէին։ Մենք ամեն ինչ ունեցել ենք պատերազմում նման ողբերգական հետևանքներ չունենալու համար։ Մի լսեք այս մարդկանց, ովքեր այս բանակից ոչինչ չեն հասկանում, ընթերցո՞ւմ եք դրսի փորձագետներին, թե միայն սրանց ասածն եք հալած յուղի տեղ ընդունում, նրանց պետք է ընթերցել»,- արձագանքել է Սերժ Սարգսյանը։

Նոր պատերազմի հավանականությանը վերաբերող հարցին ի պատասխան՝ ՀՀ երրորդ նախագահը նկատել է, որ պատերազմ լինում է պետությունների միջև, որոնք կարող են ինչ-որ չափով երկար գործողությունների գնալ։
«Ես դժվարանում եմ խոսել մեր բանակի ռեսուրսի մասին, որովհետև ստույգ տեղեկություն չունեմ, բայց որ չկա այդ կամքը, որ մեր բանակին պարտադրում են խեճացած լինել։ Ակնհայտ է, երբ քո թշնամու պահանջով շատ արագ՝ ժամերի ընթացքում խոստանում ես հետաքննություն իրականացնել ու մեղավորներին գտնել՝ վաղը մյուս օրը, երբ ադրբեջանցիները ճնշում գործադրեն՝ մեր զինվորները ցանկություն էլ չեն ունենալու դիմադրել, քանի որ այդ դիմադրելու համար էլ կարող են պատժել կամ հետաքննություն սկսել»,- ասել է նա։

Մանրամասները՝ տեսանյութում։

Աղբյուր` Փաստինֆո