Փաստ ինֆո

ՀՀ սահմանամերձ բնակավայրերում ընտանիքների բնակարանային ապահովման աջակցության պետական ծրագիրը կգործի մինչև 2025թ․ դեկտեմբերի 31-ը։ Համապատասխան որոշումն ընդունվեց Գործադիրի այսօրվա նիստում։

Նախագիծը ներկայացնելիս աշխատանքի և սոցիալական հարցերի նախարար Նարեկ Մկրտչյանը նշեց, որ ծրագրի շրջանակում այս պահին գործընկեր բանկերի կողմից ստացվել և հաստատվել է 412 շահառուի հայտ, որոնք ըստ մարզերի բաշխված են հետևյալ կերպ՝ Տավուշ՝ 239, Սյունիք՝ 54, Արարատ՝ 50, Վայոց ձոր՝ 47 և Գեղարքունիք՝ 22։

Նախարարը մանրամասնեց՝ ծրագրի շահառու կարող են լինել ՔԿԱԳ մարմիններում գրանցված ամուսիններ, որոնցից մեկն անպայման ՀՀ քաղաքացի պիտի լինի։ Եթե ամուսնության գրանցումը եղել է այլ պետությունում, ապա դարձյալ ծրագրին կարող են դիմել, եթե երկրորդ պայմանին բավարարում են՝ այսինքն ամուսիններից մեկը ՀՀ քաղաքացի է։

«Եթե ամուսինները բավարարում են վերոհիշյալ պայմաններին, ունեն սեփականության իրավունքով իրենց պատկանող հող կամ կիսակառույց, որը կառավարության որոշմամբ հաստատաված սահմանամերձ բնակավայրերից մեկում է, ունեն համայնքից շինթույլտվություն և կառուցապատման նախագիծ ու նախահաշիվ, ապա կարող են դառնալ ծրագրի շահառու»,-նշեց նախարարը։
Այս փոփոխությամբ հանվել է ծրագրին դիմելու համար երկրորդ գույք գրավ դնելու պայմանը։

Նախարարը նաև նշեց, որ մինչ այս պահը ծրագրով տրամադրվել է շուրջ 1,5 մլրդ դրամ վարկ։ Բանկերն այսուհետ նաև լողացող տոկոսադրույքով վարկեր կկարողանան տրամադրել։

Ըստ ծրագրի՝ պետութունը 10 տարվա ընթացքում ամբողջությամբ կմարի մինչև 16 մլն արժողությամբ կառուցապատման հիփոթեքի մայր գումարն ու դրա գծով առաջացող տոոկսագումարը։ Վարչապետն էլ ավելացրեց, որ եթե շահառուն ցանկանում է 16 մլն-ից ավել վարկ վերցնել, ապա կարող է, ուղղակի արդեն ինքն է անում տոկոսագումարի վճարումները։

Փոխվարչապետբ Տիգրան Խաչատրյանն էլ ավելացրեց՝ ծրագրի կարևոր պայմաններից մեկն այն է, որ շինարարությունը պետք է ավարտվի 3 տարում։ Ըստ նրա՝ պարտաճանաչ վարկառու ունենալը կարևոր է բանկի համար։

Ծրագրին դիմել կարող են նաև ԼՂ-ից բռնի տեղահանվածները, եթե բավարարում են պայմանին՝ ամուսիններից մեկը ՀՀ քաղաքացի է։

Աղբյուր` Փաստինֆո