Փաստ ինֆո

ՀԱՊԿ-ում մնալը և կազմակերպության շրջանակներում լիարժեք խորհրդակցություններին, քննարկումներին վերադառնալն առաջին հերթին Հայաստանի ժողովրդի և հայկական պետության շահերից են բխում։ Այս մասին «Իզվեստիա»-ին տված հարցազրույցում ասել է ՌԴ փոխարտգործնախարար Միխայիլ Գալուզինը։

«Մեր կարծիքով, օբյեկտիվորեն Հայաստանի անվտանգության ապահովման տեսանկյունից ՀԱՊԿ մեխանիզմին տեսանելի այլընտրանք չկա։ Ավելին, ՀԱՊԿ անդամ երկրները միշտ բաց են եղել և հիմա էլ մնում են Երևանին օգնություն ցուցաբերելու համար։ Ժամանակին Հայաստանին առաջարկվել են ռազմատեխնիկական բնույթի միջոցներ, մասնագիտացված կադրերի պատրաստման, ՀԱՊԿ դիտորդական առաքելություն Հայաստանի և Ադրբեջանի սահմանային շրջաններ ուղարկելու հետ կապված միջոցներ։ Բայց, ցավոք, այդ փուլում այդ գաղափարներն ու առաջարկները հավանության չարժանացան և կյանքի չկոչվեցին»,- ասաց Գալուզինը։

Գալուզինի խոսքով, Հարավային Կովկասի ապագան պետք է որոշեն այն երկրները, որոնց համար այս տարածաշրջանը ընդհանուր տուն է։

«Այդպիսի երկրներ չեն ոչ ԱՄՆ-ն, ոչ Ֆրանսիան, ոչ էլ ԵՄ երկրները։ Ըստ այդմ, մենք ոչ արդյունավետ ենք համարում արտատարածաշրջանային ուժերին՝ «արևմտամետներին» տարածաշրջան ներքաշելը, ինչին, ցավոք, վերջին շրջանում պաշտոնական Երևանը հակված է։ Մենք տեսնում ենք, որ ոչ մի երկրում կամ տարածաշրջանում, որտեղ միջամտություն են ունեցել Միացյալ Նահանգները և նրա կողմնակիցները Եվրամիությունից ու ՆԱՏՕ-ից, կայունություն և կայուն խաղաղություն չի եղել:

«Մենք դեռ հույս ունենք, որ որքան շուտ Երևանը հաղթահարի ՀԱՊԿ-ի հետ կապված իր կասկածները և վերադառնա կառուցողական, արդյունավետ և բովանդակալից քննարկումներին՝ այս կազմակերպության օրակարգային հարցերի քաղաքական և փորձագիտական մակարդակներում, այնքան լավ»,- ասել է Գալուզինը։

Աղբյուր` Փաստինֆո